Hadith 3033a

ف: واضح ہو کہ فرائض نوافل پر ستر (70) درجہ فضیلت رکھتے ہیں لیکن بعض مسائل ایسے بھی ہیں جن میں نوافل فرائض پر فضیلت رکھتے ہیں۔ مثلاً مفلس کو جزوی یا کلی طور پر قرض سے معافی دے دینا مستحب ہے اور قرض کی ادائی میں مہلت دینا واجب ہے۔ اگر کوئی شخص مقروض کو معافی دے دے تو یہ امر مستحب فضیلت رکھتا ہے مہلت دینے پر جو واجب ہے۔ (2) سلام کی ابتداء مستحب ہے اور سلام کا جواب دینا فرض ہے۔ یہاں بھی سلام میں پہل کرنا افضل ہے جواب دینے پر حالانکہ سلام کا جواب دینا فرض ہے اس لئے کہ سلام میں پہل کرنا تواضع کی علامت ہے اور جو تواضع کرتا ہے اللہ تعالیٰ اس کو بلند فرماتے ہیں۔ (3) وقت نماز سے پہلے وضوء کرنا مستحب ہے اور جب نماز کا وقت شروع ہوجائے تو وضوء کرنا فرض ہے۔ یہاں بھی نماز کے وقت سے پہلے وضوء کرنا افضل ہے وقت نماز کے شروع ہونے پر وضوء کرنے سے جو فرض ہے۔ مذکورہ بالا تینوں امور میں نوافل اور مستحبات فرائض اور واجبات پر فضیلت رکھتے ہیں۔ (مرقات)۔