Hadith 2499

ابن عباس رضی اللہ عنہما سے روایت ہے وہ فرماتے ہیں کہ کوئی شخص کسی کی جانب سے نہ تو روزہ رکھے اور نہ کسی کی جانب سے نماز پڑھے بلکہ ہر دن یعنی ہر روزہ کے بدلہ (فدیہ میں) ایک ایک مد گیہوں (یعنی نصف صاع یعنی دو کیلو ایک مسکین کو) دیدے (اسی طرح نماز کا بھی حکم ہے کہ میت کی جانب سے ہر نماز کے بدلے میں ایک مسکین کو نصف صاع گیہوں 2 کیلو دے یا دو وقت کا کھانا کھلائے) اس حدیث کی روایت نسائی نے اپنی سنن میں کی ہے۔ اور ابوبکر رازی نے مختصر طحاوی کی شرح میں حضرت ابن عمر رضی اللہ عنہما سے روایت کی ہے کہ حضرت ابن عمرؓ نے فرمایا کہ رسول اللہ صلی اللہ علیہ وآلہ وسلم نے ارشاد فرمایا کہ اگر کوئی شخص مر جائے اور اس سے رمضان کے روزے فوت ہو گئے ہوں تو ایسے شخص کی جانب سے ہر روزہ یعنی ہر روزہ کے بدلہ نصف صاع (2 کلو گیہوں) ایک مسکین کو دیا جائے۔