Hadith 3051

ام المؤمنین حضرت عائشہ صدیقہ رضی اللہ عنہا سے روایت ہے وہ فرماتی ہیں کہ حجۃ الوداع کے موقع پر) ہم حضور نبی کریم صلی اللہ علیہ وآلہ وسلم کے ساتھ (حج کے لئے نکلے) اور ہم (اپنے تلبیہ میں) صرف حج ہی کا ذکر کرتے تھے (ام المؤمنین فرماتی ہیں کہ) جب ہم مقام سرف (جو مکہ معظمہ سے ایک مرحلہ کے فاصلہ پر ہے) میں پہنچے تو مجھے حیض آنے لگا تو (اس اندیشے سے کہ حیض کی وجہ سے میرا حج ہی باطل نہ ہو جائے) میں رو رہی تھی کہ میرے پاس حضور صلی اللہ علیہ وآلہ وسلم تشریف لائے (یہ دیکھ کر) حضور ﷺ ارشاد فرمائے کہ شاید تم حائضہ ہوگئی ہو، میں نے عرض کیا جی ہاں! (یہ سن کر) حضور صلی اللہ علیہ وآلہ وسلم نے (مجھے تسلی دیتے ہوئے) فرمایا (حج کے باطل ہونے کا خوف نہ کرو) حیض تو ایسی چیز ہے جس کو اللہ تعالیٰ نے آدم کی بیٹیوں پر مقرر کر رکھا ہے تو تم غسل کرلو، احرام باندھ لو (جیسا کہ ہدایہ میں مذکور ہے۔12) اور) وہ تمام مناسک ادا کرو جس کو ایک حاجی کیا کرتا ہے، البتہ حیض سے پاک ہونے تک بیت اللہ شریف کا طواف نہ کرو (اس لئے کہ ناپاکی کی حالت میں کعبۃ اللہ میں داخل ہونا منع ہے)۔ اس حدیث کی روایت بخاری اور مسلم نے متفقہ طور پر کی ہے۔