Hadith 3492

حضرت اسامہ بن زید رضی اللہ تعالیٰ عنہما سے روایت ہے کہ انہوں نے کہا کہ رسول اللہ صلی اللہ علیہ وسلم نے ہم کو (قبیلہ) جہینہ کے لوگوں کے پاس بھیجا تو میں ان میں کے ایک آدمی کے پاس آیا اور اس کو نیزہ سے مارنے لگا، اس نے ”لَا إِلٰهَ إِلَّا اللّٰهُ“ کہا؛ لیکن میں نے اس کے باوجود نیزہ مار کر اس کو قتل کر دیا۔ جب میں نبی کریم صلی اللہ علیہ وسلم کی خدمت میں حاضر ہوا اور آپﷺ کو اس کی خبر دی تو نبی کریم صلی اللہ علیہ وسلم نے ارشاد فرمایا: کیا تم نے اس کو مار ڈالا جب کہ وہ ”لَا إِلٰهَ إِلَّا اللّٰهُ“ کی گواہی دے چکا (تھا) تو میں نے عرض کیا: یا رسول اللہﷺ! اس نے تو ایسا صرف پناہ (بچنے) کی خاطر کیا۔ آپﷺ نے فرمایا: تو تم نے اس کے دل کو کیوں نہیں چیرا (یعنی کیا تم اس کے دل کی حالت کو جانتے تھے؟)۔9 (متفق علیہ) حضرت جندب بن عبداللہ بجلی رضی اللہ تعالیٰ عنہ کی روایت میں ہے کہ رسول اللہ صلی اللہ علیہ وسلم نے ارشاد فرمایا: تو کیا کرے گا جب قیامت کے دن کلمہ ”لَا إِلٰهَ إِلَّا اللّٰهُ“ آئے گا۔ آپﷺ نے اس کو کئی مرتبہ فرمایا۔ (مسلم)