Hadith 2988

ف: اس حدیث شریف سے حسب ذیل فوائد حاصل ہوتے ہیں۔ ایک یہ کہ جو شخص میقات سے تمتع کی نیت سے عمرہ کا احرام باندھے اور عمرہ کی ادائی کے بعد احرام کھول دے تو اس کو حج کا احرام باندھنے کے لئے دوبارہ میقات تک جانا ضروری نہیں بلکہ وہ کعبہ اللہ ہی سے حج کا احرام باندھ لے۔ اس کے برخلاف کسی کو نفلی یا قضاء عمرہ ادا کرنا ہو تو اس کو چاہئے کہ وہ تنعیم یا جعرانہ تک جائے اور وہاں سے احرام باندھ کر مکہ معظّمہ حاضر ہو اور عمرہ ادا کرے۔ دوسری بات یہ ہے کہ عورت کو عمرہ کا احرام باندھنے کے بعد حیض آ جائے تو وہ عمرہ ادا نہ کرے گی، اس لئے کہ وہ طواف کعبہ حالت حیض میں ادا نہیں کر سکتی جو عمرہ کا اہم جزء ہے۔ اس لئے وہ پاکی کا انتظار کرے گی اور پاک ہونے کے بعد عمرہ ادا کرے گی، اور اگر اس کے پاک ہونے تک نویں ذوالحجہ آ جائے تو وہ عمرہ کا احرام توڑ دے گی اس لئے کہ وہ ایام حج میں عمرہ ادا نہیں کر سکتی، اس لئے اب وہ حج کا احرام باندھ لے اور حج کے ارکان جیسے وقوف عرفہ اور رمی جمار وغیرہ ادا کرے۔ البتہ پاک ہونے تک طواف زیارت ملتوی رکھے اور پاک ہونے پر طواف زیارت کر کے حج کے مناسک پورے کرلے اور پھر دوبارہ تنعیم یا جعرانہ جا کر فوت شدہ عمرہ کا احرام باندھ کر عمرہ کی قضا کرلے۔