Hadith 5363

۞ حضرت حذیفہ و حضرت ابوہریرہ رضی اللہ تعالیٰ عنہما سے روایت ہے ان دونوں نے فرمایا: سیدنا رسول اللہ صلی اللہ علیہ وسلم نے فرمایا: اللہ تبارک و تعالیٰ لوگوں کو جمع فرمائیگا مومنین کھڑے ہوں گے یہاں تک کہ جنت انکے قریب کر دی جائیگی وہ سب حضرت آدم علیہ السلام کے پاس حاضر ہوں گے عرض کریں گے اے ہمارے والد محترم ہمارے لئے جنت کھلوائیے آپ فرمائیں گے: تمہیں جنت سے تمہارے والد کے بلا ارادہ عمل نے ہی نکالا میں اس مقام والا نہیں، میرے صاحبزادے ابراہیم خلیل اللہ علیہ السلام کے پاس جاؤ فرمایا: حضرت ابراہیم علیہ السلام فرمائیں گے میں اس مقام والا نہیں میں تو دور دور سے خلیل1 ہوں، موسیٰ علیہ السلام کا قصد کرو جن کو اللہ تعالیٰ نے شرف کلام سے نوازا، وہ حضرت موسیٰ علیہ السلام کی خدمت میں حاضر ہوں گے، آپ کہیں گے میں اس مقام والا نہیں ہوں البتہ عیسیٰ علیہ السلام کے پاس جاؤ، جو اللہ کا کلمہ اور اسکی روح ہیں عیسیٰ علیہ السلام فرمائیں گے میں اس مقام والا نہیں، تو وہ سب حضرت سیدنا محمد صلی اللہ علیہ وسلم کی خدمت میں آئیں گے، آنحضور صلی اللہ علیہ وسلم کو اجازت دی جائیگی اور امانت و صلہ رحمی بھیجے جائیں گے اور پل صراط کے سیدھے اور بائیں دو جانب کھڑے2 ہوں گے تم میں سب سے اول بجلی کی طرح گزریں گے، میں نے عرض کیا: میرے ماں باپ آپ پر قربان کوئی شے بجلی کے گزرنے کی طرح ہے؟ حضور نے فرمایا: کیا تم نے بجلی نہیں دیکھا پلک جھپکنے میں کیسے جاتی اور آتی ہے، پھر ہوا گزرنے کی طرح پھر پرندہ گزرنے کی طرح لوگوں کی دوڑ کی طرح انکے اعمال انہیں لے چلیں گے اور تمہارے نبی صراط پر تشریف فرما کہتے ہوں گے اے رب سلامت رکھ، سلامت رکھ، یہاں تک کہ بندوں کے اعمال عاجز آئیں گے حتی کہ ایک شخص آئیگا چلنے کی طاقت نہ رکھے گا مگر گھسیٹ کر اور صراط کے دو جانب کام پر مامور لٹکے ہوئے کانٹے ہوں گے جس پر مامور ہوں گے اسکو پکڑ لیں گے زخمی نجات والا ہے اور بیڑیوں سے جکڑا ہوا دوزخ میں ہے اسکی قسم جسکے قبضہ میں ابوہریرہ کی جان ہے! جہنم کا گڑھا ستر سال کی مسافت کا ہے۔ (مسلم)۔