Hadith 5398

حضرت سعید بن مسیب رضی اللہ عنہ سے روایت ہے آپ نے حضرت ابوہریرہ رضی اللہ عنہ سے ملاقات کی۔ حضرت ابوہریرہ رضی اللہ عنہ نے فرمایا: میں اللہ تعالیٰ سے مانگتا ہوں کہ مجھے اور آپ کو جنت کے بازار میں جمع فرمائے، حضرت سعید نے عرض کیا وہاں بازار ہے؟ فرمایا ہاں حضرت رسول اللہ صلی اللہ علیہ وسلم نے مجھے خبر عطا فرمائی جب جنتی جنت میں جائیں گے تو ان کے اعمال کے اضافہ کی وجہ اس میں اتریں گے، پھر انہیں دنیوی ایام میں سے روز جمعہ کی مقدار2 میں اجازت دی جائے گی تو وہ اپنے رب کی زیارت سے مشرف ہوں گے، اس کا عرش ان کے لئے ظاہر ہوگا اور جنت کے باغوں میں سے ایک باغ میں ان پر تجلی فرمائے گا، پھر ان کے لئے نور کے منبر، موتی کے منبر، یاقوت کے منبر، زمرد کے منبر، سونے کے منبر، چاندی کے منبر رکھے جائیں گے اور ان میں سے کم درجہ شخص مشک اور کافور کے ٹیلوں پر بیٹھے گا3 اور ان میں کوئی کمتر نہیں ہوگا یہ لوگ کرسیوں پر بیٹھنے والوں کو باعتبار مجلس ان سے افضل نہ دیکھیں گے حضرت ابوہریرہ رضی اللہ عنہ نے عرض کیا: یا رسول اللہ صلی اللہ علیہ وسلم! کیا ہمیں اپنے رب کا دیدار حاصل ہوگا؟ حضور صلی اللہ علیہ وسلم نے فرمایا: ہاں کیا تم سورج کو اور چودہویں کے چاند کو دیکھنے میں شک کرتے ہو؟ ہم نے عرض کیا نہیں، فرمایا: اسی طرح تمہارے رب کو دیکھنے میں شک نہیں کرو گے اس مجلس میں کوئی آدمی باقی نہ رہے گا مگر اللہ تعالیٰ بے حجاب تجلی فرمائے گا یہاں تک کہ اللہ تعالیٰ ان میں سے ایک شخص سے فرمائے گا: اے فلاں بن فلاں کیا تو وہ دن یاد رکھتا ہے جب تو ایسا ایسا کہا تھا، تو وہ دنیا میں ہوئی بعض لغزشوں کو یاد کرے گا، پھر عرض کرے گا اے رب کیا تو مجھے نہ بخشے گا فرمائے گا کیوں نہیں، میری وسعت مغفرت کی وجہ سے تو اپنے اس درجہ تک پہنچا، یہ حضرات اسی درمیان ہوں گے کہ ان پر ایک بادل چھا جائے گا اور ان پر خوشبو برسائے گا وہ اس طرح کی خوشبو کبھی نہ سونگھے ہوں گے اور ہمارا رب ہم سے فرمائے گا: اٹھو! اس بزرگی کی طرف جو بزرگی میں نے تمہارے لئے تیار کی ہے تم جو چاہو لے لو، تو ہم ایک بازار میں آئیں گے جس کو فرشتے گھیرے ہوں گے اس میں ایسی نعمتیں ہوں گی جس کے مثل نہ آنکھیں کبھی دیکھی ہوں گی 1 نہ کان کبھی سنے ہوں گے اور نہ دلوں میں خیال گزرا ہوگا تو ہمارے لئے اٹھا کر لایا جائے گا، جو ہم چاہیں گے اس میں نہ خریداری کی جائے گی اور نہ فروختگی، اسی بازار میں جنتی لوگ ایک دوسرے سے ملیں گے ایک بلند مرتبہ شخص آ کر اس سے کم درجہ والے سے ملے گا جبکہ ان میں کوئی کم نہ ہوگا اس شخص پر جو لباس یہ دیکھے گا اسے پسند آئے گا، اس کی آخری گفتگو ختم نہ ہوگی کہ اس سے زیادہ خوبصورت لباس اس پر دکھائی دے گا اس لئے کہ وہاں کسی کا غمزدہ ہونا مناسب نہیں، پھر ہم اپنے گھر لوٹ آئیں گے ہماری بیویاں ہم سے ملیں گی اور کہیں گی مرحبا و اہلا خوش آمدید مبارکباد آپ تشریف لائے ہیں جبکہ آپ پر اس سے زیادہ حسن و جمال ہے جس کے ساتھ آپ ہم سے جدا ہوئے تھے، ہم کہیں گے آج ہمیں اپنے رب جبار کی مجالست حاصل ہوئی اور ہمارا یہی حق تھا کہ ہم اسی شان کے ساتھ لوٹیں جس شان سے ہم لوٹے ہیں۔(ترمذی، ابن ماجہ)۔