Hadith 2085

جابر رضی اللہ عنہ سے روایت ہے، وہ فرماتے ہیں کہ عبداللہ بن ابی (جو منافقوں کا سردار تھا) جب اس کی نعش قبر میں رکھ دی گئی (تو عبداللہ بن ابی کے فرزند جو سچے مسلمان تھے رسول اللہ صلی اللہ علیہ وآلہ وسلم سے عرض کئے: حضور میرے والد عبداللہ بن ابی دفن کئے جا رہے ہیں، حضور تشریف لے چلیں تا کہ آپ کی برکت سے اس کی مغفرت ہو جائے، عبداللہ بن ابی کے فرزند کے کہنے سے) حضور عبداللہ بن ابی کی قبر پر تشریف لے گئے، عبداللہ بن ابی کو قبر کے گڑھے میں ڈال دیا گیا تھا، حضور کے حکم سے پھر باہر نکالا گیا تو حضور اپنے گھٹنوں کا ٹیکہ دے کر اس کو بٹھائے اور اپنا مبارک تھوک اس کے منھ میں ڈالے (تا کہ منکر و نکیر کے سوال کے وقت آسانی ہو) پھر عبداللہ بن ابی کو اپنا قمیص پہنائے (تا کہ قمیص کی برکت سے عذاب قبر سے محفوظ رہے، قمیص دینے میں ایک یہ بھی حکمت تھی کہ جب حضرت عباس رضی اللہ عنہ غزوۂ بدر کے بعد سب کافروں کے ساتھ قید ہو کر مدینہ منورہ میں لائے گئے تو حضرت عباس کے جسم پر کرتہ نہیں تھا، حضرت عباس طویل القامت تھے کسی کا کرتہ حضرت عباس کو نہیں آیا، عبداللہ بن ابی بھی طویل القامت تھا اس کا کرتہ عباس کو آیا اس لئے) عبداللہ بن ابی نے اپنا کرتہ حضرت عباس کو پہنایا تھا (عبداللہ بن ابی کا یہ احسان حضرت کو یاد تھا، اس کا احسان اتارنے کے لئے اپنا کرتہ عبداللہ بن ابی کو پہنائے، اس سے یہ بھی مقصود تھا کہ عبداللہ بن ابی کے فرزند جو سچے مسلمان تھے خوش ہو جائیں، یہ تھے رسول اللہ صلی اللہ علیہ وآلہ وسلم کے اخلاق حسنہ کہ سخت سے سخت دشمن کے ساتھ بھی آپ کے یہ کریمانہ اخلاق اور کریمانہ برتاؤ تھا، اس لئے اللہ تعالیٰ کا ارشاد ہوا ہے ”وَإِنَّكَ لَعَلٰى خُلُقٍ عَظِيْمٍ“۔ (سورۃ قلم، پ:29، ع:1، آیت نمبر:4) بے شک اے رسول آپ بڑے حسن اخلاق والے ہیں، اس کو کریمانہ اخلاق کا یہ اثر ہوا کہ ایک ہزار کافر اس کریمانہ برتاؤ کو دیکھ کر مسلمان ہوگئے۔) اس حدیث کی روایت بخاری اور مسلم نے متفقہ طور پر کی ہے۔