Hadith 2239

جابر بن عتیک رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وآلہ وسلم ارشاد فرمائے ہیں کہ عنقریب تمہارے پاس زکات وصول کرنے والے سوار آئیں گے جن کو تم (اس وجہ سے) ناپسند کرو گے (کہ وہ تمہارا مال لینے آتے ہیں، یہ ناگواری مال کی جدائی کی وجہ سے طبعاً ہوتی ہے شرعاً نہیں) لیکن جب وہ تمہارے پاس آئیں تو تم خوش ہو کر ان کا استقبال کرو (اور ان کی تعظیم کرو) اور جو کچھ وہ تم سے زکات میں طلب کریں اس کو پورا پورا ادا کرو۔ (کسی چیز کو ان سے چھپائے نہ رکھو) اگر وہ (زکات کی وصولی میں) انصاف سے کام لیں گے تو یہ ان ہی کے فائدے کی چیز ہوگی (اور اس کا ان کو ثواب ملے گا) اور اگر وہ (زکات کا مال وصول کرنے میں) زیادتی کریں گے (یعنی چن کر اچھا مال لیں گے یا نصاب سے زیادہ لیں گے) تو اس کا گناہ ان ہی پر ہوگا (اور ان کے ظلم کو برداشت کرنے کا ثواب بھی تم کو ملے گا) بہرحال جس طرح ممکن ہو تم ان کو خوش کر دیا کرو کیوں کہ تمہارا (نصاب کے موافق زکات دینے سے قرض تو ادا ہو جائے گا لیکن کامل ثواب) اسی وقت پورا پورا حاصل ہو سکے گا جب کہ تم ان کی خوشی حاصل کرو (اس وجہ سے کہ عاملین زکات سلطان کی طرف سے مقرر ہوتے ہیں، ان کی مخالفت سلطان کی مخالفت ہوگی، اور سلطان کی مخالفت فتنہ اور فساد کا سبب ہے) (اور تم ان کو اپنے حسن سلوک سے اس طرح خوش کر دو کہ) وہ تمہارے لئے دعا کریں۔ اس کی روایت ابوداؤد نے کی ہے۔