Hadith 390

ف(1): حضور اکرم صلی اللہ علیہ وسلم کا ارشاد ہے کہ مجھے اپنی امت پر دشواری کا خیال نہ ہوتا تو نماز عشاء کو دیر سے پڑھنے کا حکم دیتا اس کے متعلق جمہور علماء کا اتفاق ہے کہ عشاء کے دیر سے پڑھنے کا استحباب تہائی رات یا نصف شب تک ہے، البتہ امام شافعی رحمہ اللہ علیہ کے پاس اول شب پڑھنا مستحب ہے۔12 ف(2): ردالمحتار میں لکھا ہے کہ مسواک کرنا احناف کے پاس وضوء کی سنت ہے اور شوافع کے پاس مسواک کرنا نماز کی سنت ہے، یہ بحر الرائق میں مذکور ہے، اس اختلاف کا نتیجہ یہ ہے کہ ایک شخص نے ایک ہی وضوء سے کئی نمازیں ادا کیں تو احناف کے پاس اس شخص کا وضوء میں ایک دفعہ مسواک کرنا کافی ہوگا اور حدیث میں مسواک کے متعلق جو فضیلت مذکور ہے وہ اس کو حاصل ہو جائے گی لیکن امام شافعی رحمہ اللہ علیہ کے پاس ایسے شخص کا وضوء میں ایک دفعہ مسواک کر لینا کافی نہ ہوگا بلکہ ہر نماز کے لئے اس کو مسواک کرنا ہوگا کیونکہ ان کے پاس مسواک نماز کی سنت ہے۔ صاحب ردالمحتار نے اس بارے میں احناف اور شوافع کے مسلک کی موافقت پر بڑے عمدہ طریقے سے توضیح فرمائی ہے، فرماتے ہیں کہ امام احمد رحمہ اللہ علیہ نے مسواک کی فضیلت میں یہ حدیث روایت کی ہے ”صَلَاةٌ بِسِوَاكٍ أَفْضَلُ مِنْ سَبْعِينَ صَلَاةً بِغَيْرِ سِوَاكٍ“ (ایک نماز مسواک کے ساتھ افضل ہے ایسی ستر نمازوں سے جو بغیر مسواک کے ادا کی جائیں) لیکن امام شافعی رحمہ اللہ علیہ کے پاس اس حدیث میں مسواک کی جو فضیلت موجود ہے، وہ فضیلت اس وقت تک حاصل نہیں ہوگی جب تک کہ مسواک کو ہر نماز کے وقت نہ کیا جائے لیکن احناف کے پاس یہ فضیلت اس وقت بھی حاصل ہوجاتی ہے جب کہ وضوء کے وقت مسواک استعمال کی جائے اگرچہ نماز کے وقت مسواک نہ کی ہو، احناف کے پاس مسواک کو وضوء کی سنت قرار دینے سے اس بات کی نفی نہیں کہ مسواک نماز کے وقت مستحب نہیں بلکہ احناف کے پاس مسواک نماز کے وقت بھی مستحب ہے۔ احناف کے پاس مسواک جب محفلوں میں لوگوں سے ملاقات کے موقع پر مستحب ہے تو نماز کے وقت جس میں اللہ تعالیٰ سے مناجات اور سرگوشی کی جاتی ہے تو ایسے مبارک موقع پر کیسے مستحب نہ قرار دی جائے گی، چنانچہ نماز کے وقت مسواک کو مستحب قرار دینے کا ذکر حلبی نے شرح المنیہ الصغیر میں کیا ہے اور تاتارخانیہ نے تتمہ سے نقل کیا ہے کہ ”وَيُسْتَحَبُّ السِّوَاكُ عِنْدَنَا عِنْدَ كُلِّ صَلَاةٍ وَ وُضُوءٍ“ (مسواک ہمارے یعنی احناف کے پاس ہر نماز اور ہر وضوء کے وقت مستحب ہے)۔ خلاصہ یہ ہے کہ حدیث میں ”عِنْدَ كُلِّ صَلَاةٍ“ کے حکم پر شوافع اور احناف دونوں نے عمل کیا ہے کہ شوافع نے مسواک کو نماز کی سنت قرار دیا اور احناف نے مسواک کو نماز کے لئے مستحب رکھا، حدیث پر دونوں نے عمل کیا، فرق صرف اتنا ہے کہ شوافع نے اس کو سنت قرار دیا اور احناف نے مستحب۔ (صاحب ردالمحتار فرماتے ہیں کہ اس نایاب تحریر کی قدر کرو اور اس کو غنیمت سمجھو۔ ردالمحتار کی پہلی عبارت یہاں ختم ہوئی۔)12