Hadith 3962

7قولہ: لا تصلح قبلتان في ارض واحدة الخ (ایک زمین میں دو قبلے درست نہیں ہیں) حاشیہ میں صح سے منقول ہے ظاہر بات یہ ہے کہ یہ نفی بمعنی نہی ہے اور مومن کو سر زمین کفر میں قیام پذیر ہونے سے منع کرنا مقصود ہے یا حکام کو اس بات سے منع کرنا ہے کہ وہ ذمیوں کو مسلمانوں کے ملک میں شعائر کفر ظاہر کرنے کی قدرت دیں۔ (بذل المجہود) صاحب مرقات نے کہا ہے: تُورِبِشْتی رحمہ اللہ نے کہا کہ ایک زمین میں دو دین غلبہ اور برابری کے ساتھ قائم نہیں رہ سکتے۔ البتہ مسلمان کے لئے کافروں کے درمیان سکونت اختیار کرنا درست نہیں ہے کیونکہ مسلمان اگر ایسا کرے تو گویا اس نے اپنے آپ کو ان کے درمیان اس مقام پر لا کھڑا کیا ہے جو ہمارے درمیان ذمی کا مقام ہے۔ اور اس (مسلمان) کے لئے مناسب نہیں کہ اپنی طرف ذلت کو کھینچ لائے اور ان لوگوں کی علامت اختیار کرے جن پر جزیہ مقرر کیا گیا ہے اور اس کے لئے ذلت و حقارت کیوں کر ہو سکتی ہے۔ جب کہ عزت تو اللہ تعالیٰ اور اس کے رسول کے لئے اور مومنوں کے لئے ہی ہے۔ البتہ جس کا مذہب دین اسلام کے مخالف ہو تو اس کو جزیہ کی ادائی کے ذریعہ سے ہی دارالاسلام میں قیام کی گنجائش دی جا سکتی ہے پھر بھی اس کو اپنے مذہب کی نشر و اشاعت کی اجازت نہیں دی جائے گی۔ اور کہا گیا کہ اس حدیث شریف میں یہود و نصاریٰ کو جزیرہ عرب سے نکال دینے کی طرف اشارہ ہے۔ ابن الملک رحمہ اللہ نے کہا ہے یعنی مسلمان اور کافر کا جزیرہ العرب کے کسی ایک شہر میں بود و باش اختیار کرنا درست نہیں ہے۔ اور یہ حکم جزیرہ عرب کے ساتھ مخصوص ہے۔ 8قولہ: وليس على المسلم جزية الخ (اور مسلمان پر جزیہ نہیں ہے) یعنی جس شخص پر جزیہ مقرر ہے اگر وہ ایک سال مکمل ہونے کے بعد اسلام قبول کرے تو اس سے جزیہ ساقط ہو جاتا ہے۔ حضور صلی اللہ علیہ وسلم کے ارشاد کی وجہ سے کہ ”من اسلم فلا جزية عليه“ جو اسلام قبول کرے تو اس پر جزیہ نہیں ہے۔ اس کے سوا نہیں کہ اسلام کے باعث غلامی ساقط نہیں ہوتی کیونکہ اس (غلامی) سے ایک معین حق متعلق ہے جو اسلام کی وجہ سے باطل نہیں ہوگا۔ اس (حکم سقوط) کو جزیہ سے مخصوص کیا گیا کیونکہ قرضہ جات، خراج اور اجرت (اسلام کی وجہ سے اور موت کی وجہ سے بالاتفاق ساقط نہیں ہوتے۔ اور امام شافعی رحمہ اللہ نے کہا ہے جزیہ اسلام اور موت کی وجہ سے ساقط نہیں ہوتا کیونکہ وہ بھی ایک قرض ہے اور موت کے بارے میں یہی بات امام مالک رحمہ اللہ نے بھی کہی ہے اور یہ اس لئے بھی کہ (جزیہ) حفاظت کے اور دارالاسلام میں رہائش کے بدلے میں واجب ہوا ہے اور کافر کو عصمت و سکونت حاصل ہونے کی وجہ سے وہ چیز مل چکی ہے جس کا عوض جزیہ ہے لہذا اس (کافر) سے کسی عارضی شئے کی وجہ سے عوض ساقط نہیں ہوگا۔ اور ہماری دلیل وہ حدیث شریف ہے جس کو ہم نے روایت کیا ہے اور اس لئے کہ جزیہ اس کے قتل کے بدلے میں ہے کیونکہ وہ کفر کی سزا کے بطور واجب ہے۔ یا نصرت و مدد کے بدلے کے طور پر ہے اور کفر کی سزا اسلام قبول کرنے کے بعد اور مرنے کے بعد باقی نہیں رہتی اور اس لئے بھی کہ دنیا میں سزا کا مقرر کیا جانا تو صرف دفع شر کے لئے ہوتا ہے اور یہ (شر) موت اور اسلام کے ذریعہ دفع ہو چکا ہے اور اس لئے بھی کہ یہ ہمارے حق میں نصرت کے بدلے میں واجب ہے۔ اور وہ اسلام لانے کے بعد اس پر (نصرت پر) قادر ہو چکا ہے اور عصمت اس کے آدمی ہونے کی بناء پر ثابت ہوتی ہے۔ اور ذمی اپنے نفس کا مالک ہو کر رہتا ہے اس لئے حفاظت و سکونت کا بدل واجب کرنا کوئی معنی نہیں رکھتا اور اس کا مطلب یہ ہے کہ ذمی اپنے رہائش کے مقام کو خرید کر یا اس کے سوا دوسرے اسباب کے ذریعہ مالک بن سکتا ہے اس لئے اس کے مملوکہ مقام میں رہائش کا بدل واجب کرنا جائز نہیں۔ (ماخوذ از: شرح کنز، بذل المجہود، عنایہ) 9 قولہ: فامرنی ان اخذ من المسلمين الخ (اور مجھے حکم فرمایا کہ میں وصول کروں) تجارتی اموال کے بارے میں یہی بات مذہب میں مقرر ہے کہ حربی کے مال سے دسواں حصہ اور ذمی سے بیسواں حصہ لیا جائے گا۔ اور مسلمان سے چالیسواں حصہ لیا جائے گا، ان شرائط کے ساتھ جو کتاب الزکوۃ میں مذکور ہیں۔ اور یہ تفصیل عمر رضی اللہ عنہ سے مروی ہے کہ آپ نے صحابہ کرام کے مجموعہ میں اپنے عمال کو یہی حکم فرمایا تھا پھر جو زکوۃ مسلمان سے لی جائے گی وہ اس کے مصارف میں خرچ کی جائے گی اور جو ذمی اور حربی سے لی جائے گی وہ زکوۃ نہیں ہے۔ اس کو جزیہ و خراج کے مصرف میں خرچ کیا جائے گا۔ اور حربی سے لے جانی والی چیز کا حکم بھی ایسا ہی ہے۔ بلکہ ان دونوں سے حفاظت کی غرض سے لیا جاتا ہے جیسا کہ بنایہ میں ہے۔ (ماخوذ از: مرقات وعمدۃ الرعایۃ) 10 قولہ: ان أبوا أن لا تاخذوا كرها فخذوا...... الخ (اگر وہ زبردستی لینے کے سوا کسی بھی صورت سے انکار کریں تو ان سے لو) صاحب مرقات نے کہا ہے کہ یہ ابتداء اسلام میں تھا کیونکہ حضور صلی اللہ علیہ وسلم فوجوں کو غزوہ کے لئے روانہ فرماتے، وہ اپنے راستوں میں عرب کے قبیلوں سے گزرتے وہاں کوئی بازار نہیں ہوتا کہ اس سے غلہ خریدیں اور نہ ان کے پاس کوئی توشہ ہوتا لہذا ان کی ضیافت کو ان پر واجب قرار دیدیا تاکہ یہ لوگ جنگ سے منقطع نہ ہوجائیں پس جب اسلام قوی ہوگیا اور لوگوں کے ساتھ مہربانی و شفقت کا غلبہ ہوا تو اس کا وجوب منسوخ ہوگیا اور جواز و استحباب باقی رہا۔