Chapter on What Should Be Said at the Time of Death

ف: درمختار میں مذکور ہے کہ اس طرح تلقین کرنا مستحب ہے اور بعضوں نے اس کو واجب بھی قرار دیا ہے، مرنے والے کو کلمۂ توحید پڑھنے کا حکم نہ کرے کہ وہ سکرات کی تکلیف کی وجہ سے کہیں انکار نہ کردے، اگر مرنے والا ایک دفعہ کلمۂ توحید پڑھ لے تو دوبارہ اس کو کلمۂ توحید پڑھنے پر اصرار نہ کرے ہاں اگر وہ کلمۂ توحید پڑھنے کے بعد دنیا کی کوئی بات کیا ہو تو اس کے سامنے پھر کلمۂ توحید پڑھتے تاکہ وہ اس کو سن کر خود بھی کلمۂ توحید پڑھ لے اور اس کا آخر کلام ”لَا إِلٰهَ إِلَّا اللّٰهُ مُحَمَّدٌ رَّسُوْلُ اللّٰهِ“ ہوا یہاں ہی دفن کے بعد بھی قبر کے پاس بیٹھ کر کلمۂ توحید ”لَا إِلٰهَ إِلَّا اللّٰهُ مُحَمَّدٌ رَّسُوْلُ اللّٰهِ“، آواز سے پڑھنا اہل السنّت والجماعت کے پاس جائز ہے جیسا کہ جوہرہ میں مذکور ہے، اس لئے کہ مردہ اس کو سنتا ہے اور اس کو فرشتوں کے سوال و جواب دینے میں سہولت ہوتی ہے، قبر کے پاس بیٹھ کر تلقین ان الفاظ سے کی جائے: ”يَا فُلَانُ يَا ابْنَ فُلَانٍ اُذْكُرْ مَا كُنْتَ عَلَيْهِ وَقُلْ رَضِيتُ بِاللّٰهِ رَبًّا وَّ بِالْإِسْلَامِ دِينًا وَّبِسَيِّدِنَا مُحَمَّدٍ صَلَّى اللّٰهُ عَلَيْهِ وَسَلَّمَ نَبِيًّا“۔ یعنی مردہ کا نام اور اس کے باپ کا نام لے کر یہ کہے کہ دنیا میں جیسے تو توحید اور رسالت کا اقرار کیا کرتا تھا، اب بھی فرشتوں کے سامنے توحید و رسالت کا اقرار کر (ڈرنا نہیں، کچھ غمزدہ نہیں ہونا اسی طرح کہنا کہ میں دل سے راضی ہوں کہ اللہ میرا رب ہے اور دین میرا اسلام ہے اور رسول میرے حضرت محمد صلی اللہ علیہ وآلہ وسلم ہیں۔ تلقین کرنے والے سے جب مردہ یہ سنتا ہے اور یہی فرشتوں کو جواب دینا چاہتا ہے تو فرشتے کہتے ہیں اس کے بھائی نے اس کو سکھا دیا ہے، اب اس سے پوچھنے کی ضرورت نہیں، ایسا درمختار میں مذکور ہے اور امام سیوطی نے اپنے رسالہ میں ایسی ہی تصریح کی ہے اور جوہرہ میں یہ بھی مذکور ہے کہ قبر میں جن سے سوال نہیں ہوتا ہے ان کو تلقین نہیں کرنا چاہئے اور شرح سنیہ میں لکھا ہے کہ جن سے قبر میں سوال نہیں ہوتا وہ آٹھ لوگ ہیں: (1) ایک اللہ کی راہ میں کافروں کے مقابلہ میں لڑکر شہید ہونے والا۔ (2) دوسرا وہ شخص ہے جو سرحد اسلام پر سرحد کی حفاظت کر رہا ہے اور وہ اپنی موت سے مر گیا تو اس سے بھی قبر میں سوال نہیں ہوتا ہے (3) تیسرا شخص جس سے قبر میں سوال نہیں ہوتا وہ ہے جو طاعون میں مبتلا ہوکر مرے (4) چوتھا وہ شخص جس سے قبر میں سوال نہیں ہوتا ہے وہ ہے جو طاعون کے زمانہ میں کسی دوسری بیماری میں مبتلا ہوکر مرے بشرطیکہ وہ اس پر صابر اور طالب ثواب رہا ہو (5) پانچویں وہ لوگ جن سے قبر میں سوال نہیں ہوتا وہ صدیق ہیں جو انبیاء کرام کی امت میں سب سے زیادہ درجہ کے ہوتے ہیں، جن میں کمال باطنی بھی ہوتا ہے اور جن کو عرف میں اولیاء کہا جاتا ہے (6) چھٹے نابالغ بچے ہیں جن سے قبر میں سوال نہیں ہوتا ہے (7) ساتویں وہ لوگ ہیں جو جمعہ کے دن یا شب جمعہ مرے ہوں، ان سے قبر میں سوال نہیں ہوتا (8) آٹھواں وہ شخص جس سے قبر میں سوال نہیں ہوتا وہ ہے جو ہر رات میں سونے سے پہلے سورۃ ا لملک (سورۃ تبارک الذی) پڑھ کر سوتا ہو اور بعض علماء فرماتے ہیں کہ وہ شخص جو اپنے مرض الموت میں سورہ ”قل ہو اللہ احد“ پڑھا ہو، اس سے بھی قبر میں سوال نہیں ہوتا ہے۔ 12

ف: اس حدیث شریف میں فرمایا گیا ہے کہ ”لَا إِلٰهَ إِلَّا اللّٰهُ“، جس کا آخری کلام ہو، وہ جنت میں داخل ہوگا۔ مراد ”لَا إِلٰهَ إِلَّا اللّٰهُ“ سے پورا کلمہ طیبہ یعنی لَا إِلٰهَ إِلَّا اللّٰهُ مُحَمَّدٌ رَّسُولُ اللّٰهِ ہے، یہ ایسا ہی ہے جیسے جزو کہہ کر کل مراد لیتے ہیں، مثلاً کوئی کہے کہ ”قل ہواللہ“ پڑھنے کا یہ ثواب ہے تو اس کا مطلب یہ ہوتا ہے کہ پورا سورہ ”قل ہواللہ“ پڑھنے پر یہ ثواب ملتا ہے ایسا ہی ”لَا إِلٰهَ إِلَّا اللّٰهُ“ پڑھنے کا جو حکم ہو رہا ہے، جزو کہا گیا ہے مراد پورا کلمہ پڑھنا ہے یعنی جس کا آخری کلام ”لَا إِلٰهَ إِلَّا اللّٰهُ مُحَمَّدٌ رَّسُوْلُ اللّٰهِ“ ہو وہ جنت میں داخل ہوگا، اور اس حدیث شریف میں یہ بھی اشارہ ہے کہ مرنے والے کے سامنے ”لَا إِلٰهَ إِلَّا اللّٰهُ مُحَمَّدٌ رَّسُوْلُ اللّٰهِ“ آواز سے پڑھ کر تلقین کی جائے تاکہ مرنے والا بھی زبان سے یا دل میں ”لَا إِلٰهَ إِلَّا اللّٰهُ مُحَمَّدٌ رَّسُوْلُ اللّٰهِ“ پڑھے اور اس کلمۂ طیبہ پر اس کا خاتمہ ہو اور وہ جنت میں داخل ہو جائے۔12

ف: محبان رسول کے لئے یہ حدیث شریف بڑی تسلی دلاتی ہے، اگر ابھی وقت نہیں آیا ہو کہ تم حضور کی خدمت اقدس میں پہنچ سکو تو کیا ہوا تمہارا سلام تو مرنے والے کے ذریعہ سے بھی دربار نبوت میں پہنچ جاتا ہے، اس لئے کہ تم اپنے اس سلام کو جس مرنے والے کو پہنچانے کے لئے کہتے ہیں، اس پر تمہارے سلام کو حضور کی خدمت میں پہونچانا ضروری ہو جاتا ہے۔ ایسا ہی ردالمحتار میں شرنبلالی کے حوالے سے کہا ہے۔12

ف: البحر الرائق میں مجتبی کے حوالہ سے لکھا ہے کہ میت کو بوسہ دینا جائز ہے، اور عمدۃ القاری میں بھی ایسا ہی مذکور ہے اور مرقات میں لکھا ہے کہ مردہ پر بغیر آواز کے آنسوؤں سے رونا جائز ہے۔12

شرک بہت بری بلا ہے، آسمان کا دروازہ مشرک کے لئے نہ کھلنا کیا کم ذلت ہے، پھر زمین کی طرف پھینک دیا جانا، اس سے بڑھ کر اور کیا ذلت ہوگی، راستہ میں فرشتوں سے طرح طرح کی اذیت اٹھاتے ہوئے سجین میں جا گرنا اور وہاں طرح طرح کی ایذاء اٹھاتے رہنا یہ انتہائی ذلت ہے۔ اللہ تعالیٰ کے حکم کی تعمیل کی جائے گی، اس کافر کی روح کا تعلق اس کے جسد سے یا جسم کے کسی حصہ سے کر دیا جائے گا، پھر منکر و نکیر اس کے پاس موجود ہوں گے اور بٹھا کر سوال کریں گے، بتا تیرا رب کون ہے؟ تو وہ کافر (حیران ہو گا کہ کیا جواب دوں، جب تک میں دنیا میں رہا، مسلمان جس ذات مبارک کو رب مانتے تھے، میں ان کو جھٹلاتا رہا اب میں کس کو رب کہوں، یہاں بھی اسی طرح کہتا ہوں) میں نہیں جانتا کہ رب کون ہے! پھر منکر و نکیر دریافت کریں گے اچھا یہ بتا کہ تیرا دین کیا تھا (تو یہ کافر مردہ سمجھے گا میرا دین تو کفر و شرک سے بھرا ہوا تھا اگر میں اپنے دین کا نام لوں تو اپنے آپ کو اپنی زبان سے مجرم ٹھہرانا پڑے گا اس لئے) کافر مردہ کہے گا مجھے نہیں معلوم کہ میرا دین کیا تھا، پھر منکر و نکیر دریافت کریں گے کہ تو دنیا میں سنا ہو گا کہ حضرت محمد صلی اللہ علیہ وآلہ وسلم رسول ہو کر آئے تھے ان کی نسبت تیرا کیا خیال تھا (تو کافر مردہ خیال کرے گا کہ عالم برزخ میں تو حضرت محمد صلی اللہ علیہ وآلہ وسلم کا بول بالا ہے اگر میں ان کی رسالت کا انکار کروں تو اپنے منہ سے آپ ملزم ٹھہرتا ہوں اس لئے) کہے گا میں نہیں جانتا کہ وہ کون تھے؟ یہ جواب ختم ہوتے ہی اللہ تعالیٰ کی طرف سے کوئی پکارے گا کہ اس خبیث کافر کو دنیا میں سب کچھ معلوم تھا، جھٹلاتا ہی رہا، اب بھی باوجود معلوم ہونے کے جھوٹ کہہ رہا ہے، اس جھوٹ کے لئے آگ کا بچھونا بچھا دو (تا کہ اس کو ایک آن بھی آرام نہ ملے) اور دوزخ کی طرف سے ایک دروازہ کھول دو، (تا کہ وہ دوزخ میں اپنا مقام دیکھتا رہتا کہ یہ بھی اس کے لئے تکلیف کا باعث ہوتا رہے اور دوزخ کی طرف سے) دروازہ کھلنے سے ناقابل برداشت حرارت اور دوزخ کی آگ کی لو (اور دوزخ کی بدبو) اس کو پہنچتی رہے (تاکہ قبر کے عذاب پر یہ عذاب زیادہ ہو جائے) پھر اس کافر کی قبر ایسی تنگ کی جائے گی کہ جس کے دبوچنے سے کافر کی پسلیاں اِدھر کی اُدھر اور اُدھر کی اِدھر ہو جائیں گی (کافر کے لئے بجائے خود یہ بھی ایک عذاب ہوگا) پھر کافر کیا دیکھے گا کہ اس کے پاس ایک شخص آ رہا ہے نہایت بدشکل (کہ جس کا دیکھنا ہی بجائے خود عذاب ہے) کپڑے بھی اس کے (اس کی صورت کے جیسے) بد نما رہیں گے، اور بدبو اس سے اس قدر آ رہی ہوگی (کہ جس سے دماغ پھٹا جا رہا ہو) ایسا بدشکل شخص آ کر کافر مردہ سے کہے گا طرح طرح کے عذاب کی تجھے خبر دی جاتی ہے (دنیا میں) جس دن سے تجھے ڈرایا جاتا تھا (اور جس کا تو انکار کرتا تھا) دیکھ آج یہ وہی دن ہے، کافر مردہ کہے گا (کہ میں خود عذاب میں ہوں تو اور عذاب کی خبر دینے آیا ہے) تو کون ہے؟ تیری کیا منحوس صورت ہے کہ تیری صورت دیکھنا ہی عذاب معلوم ہوتا ہے، تو وہ بدشکل آنے والا کہے گا تو مجھے نہیں پہچانا، میں تیرا برا عمل ہوں (کم بخت تو نے دنیا میں کیا کیا کفر و شرک میں رہا ہمیشہ اللہ تعالیٰ کی نافرمانی کرتا رہا، اگر کوئی کہے کہ تجھے یہ دن دیکھنا ہوگا تو تو اس کو مذاق میں اڑاتا رہا، کبھی اس کو غصہ سے جھڑکتا رہا، کافر مردہ سمجھے گا کہ میرے اعمال مجھے دکھائے گئے ہیں، برے اعمال سے دوزخ ملتی ہے) خدا کرے کہ قیامت نہ آئے (تاکہ بُرے اعمال کے بدلہ میں دوزخ میں جانا نہ پڑے) ایک روایت تو یہاں ختم ہوئی۔

اس کی روایت امام احمد نے کی ہے اور اس کی روایت ابوداؤد نے اپنی سنن میں اور حاکم نے اپنی مستدرک میں ابن ابی شیبہ نے اپنی مصنف میں اور بیہقی نے کتاب عذاب القبر میں اور طیالسی نے اپنی مسند میں اور عبد بن حمید نے اپنی مسند میں اور ہناد بن السری نے کتاب الزہد میں اور ابن جریر اور ابن ابی حاتم نے صحیح طرق سے اس کی روایت کی ہے اور میرک نے کہا ہے کہ امام احمد کی حدیث حسن ہے۔ روح انسانی عالم ملکوت کی رہنے والی مثل فرشتوں کے ہے جیسے فرشتے ایک ہی وقت میں کئی جگہ دکھائی دے سکتے ہیں اور جیسے ملک الموت ہر مرنے والے کے پاس دکھائی دیتے ہیں، ایسا ہی روح انسانی بھی کئی جگہ دکھائی دے سکتی ہے، مگر جب جسم انسانی میں روح مقید ہوتی ہے تو اس سے یہ صفت نکل جاتی ہے، کئی جگہ نظر نہیں آسکتی ہے مگر اولیاء اللہ کے جسم میں جو روح ہوتی ہے اس روح میں اس کی اصلی صفت پائی جاتی ہے کہ باوجود جسم میں ہونے کے ایک وقت میں کئی جگہ نظر آ سکتی ہے، جیسے حضرت مجدد الف ثانی رحمۃ اللہ علیہ ایک ہی وقت میں سات دعوتوں میں نظر آئے، جسم سے نکلنے کے بعد روح میں اس کی اصلی صفت لوٹ آتی ہے، کچھ اولیاء اللہ کی تخصیص نہیں بلکہ ہر مسلمان کی روح ایک وقت میں کئی جگہ رہ سکتی ہے، اسی لئے روح کا اصلی مقام علیین ہے قبر سے بھی اس کا تعلق رہتا ہے، قبر پر آنے والوں کو پہچانتی اور ان کے سلام کا جواب دیتی ہے، اس جسم خاکی کے ساتھ روح جنت میں نہیں جاسکتی، ہاں قیامت کے بعد جسم خاکی میں ہو کر روح جنت میں داخل ہوگی۔ بغیر جسم خاکی کے اب بھی روح جنت میں جاسکتی ہے، جیسے اس حدیث میں: