بَابُ سُجُودِ الْقُرْآنِ

ف۔ اس حدیث شریف میں ارشاد ہے ”أُمِرَ ابْنُ آدَمَ بِالسُّجُودِ فَسَجَدَ“ الخ (انسان کو سجدہ کا امر۔ حکم۔ کیا گیا) یہ ایک قاعدہ کلیہ ہے کہ حکیم جب غیر حکیم کی بات سنائے پھر اس غیر حکیم کی اس بات کا انکار نہ کرے تو حکیم کا غیر حکیم کی بات کو سنا کر رد نہ کرنا اس سے ثابت ہوتا ہے کہ حکیم نے غیر حکیم کی جو بات سنائی ہے وہ صحیح ہے۔ واضح ہو کہ یہاں حکیم رسول اللہ صلی اللہ علیہ وآلہ وسلم ہیں اور غیر حکیم شیطان ہے، اور غیر حکیم کی بات جو سنائی گئی ہے وہ یہ ہے ”أُمِرَ ابْنُ آدَمَ بِالسُّجُودِ فَسَجَدَ، غور کیجئے کہ حکیم یعنی رسول اللہ صلی اللہ علیہ وآلہ وسلم نے غیر حکیم یعنی شیطان کی یہ بات سنائی کہ (انسان کو سجدہ کا امر کیا گیا) اور شیطان کی اس بات کو سنا کر رسول اللہ صلی اللہ علیہ وآلہ وسلم نے شیطان کے اس قول کا رد نہیں فرمایا اور رسول اللہ صلی اللہ علیہ وآلہ وسلم کا شیطان کے اس قول کو رد نہ فرمانا اس سے ثابت ہوتا ہے کہ حقیقت میں انسان کو سجدہ کرنے کا امر ہوا تھا، اور یہ بھی واضح ہے کہ امر مطلق سے وجوب کا فائدہ حاصل ہوتا ہے اور چونکہ یہاں مطلقاً سجدہ کرنے کا حکم ہوا ہے اس لئے سجدہ کرنے کے اس مطلق امر سے ثابت ہوا کہ سجدہ تلاوت کا ادا کرنا واجب ہے۔ یہاں ایک یہ شبہ کیا جا سکتا ہے کہ امر وجوب کے علاوہ استحباب کے لئے بھی ہوتا ہے تو یہاں سجدہ کرنے کے امر کو کیوں مستحب نہ قرار دیا جائے؟ اس شبہ کا جواب یہ ہے کہ قرینہ سے یہاں سجدہ کرنے کا وجوب ثابت ہوتا ہے، استحباب ہمیشہ نہیں ہوتا۔ اس لئے کہ سجدہ نہ کرنے پر دوزخ کی وعید ہے اور سجدہ کرنے پر جنت کا وعدہ ہے اور اس قسم کا وعدہ اور وعید کسی امر مستحب کے لئے نہیں آتا بلکہ امر واجب کے لئے ہی ہوتا ہے اس طرح اس سے بھی ثابت ہوا کہ یہاں سجدہ کا امر، امر واجب ہے نہ کہ امر مستحب۔ ہر دو دلیلوں سے ثابت ہوا کہ سجدہ تلاوت کا ادا کرنا واجب ہے۔ سجدہ تلاوت کے وجوب پر تیسری دلیل یہ ہے کہ آیات سجدہ سے بھی سجدہ تلاوت کے واجب ہونے کا پتہ چلتا ہے اس لئے کہ سجدہ کی آیتیں تین طرح کی ہیں، ایک تو وہ ہیں جن میں صراحت کے ساتھ سجدہ کا امر ہوا ہے۔ دوسرے وہ آیتیں ہیں جو انبیاء علیہم الصلوٰۃ والسلام کے سجدہ کرنے کے واقعات کے بیان پر مشتمل ہیں اور تیسرے وہ آیتیں ہیں جو کفار اور مشرکین کی ایسی حکایتوں پر مشتمل ہیں جن میں ان کو سجدہ کرنے کا امر کیا گیا تو انہوں نے انکار کیا۔ آیات سجدہ کی یہ تینوں قسمیں یعنی امر خداوندی کی تعمیل، انبیاء علیہم الصلوٰۃ والسلام کی اقتداء اور اتباع اور کفار و مشرکین کی مخالفت، یہ تینوں چیزیں واجب ہیں، بشرطیکہ ان میں سے کسی چیز کے واجب نہ ہونے پر کوئی دلیل قائم نہ ہو جائے، چونکہ آیات سجدہ کی مذکورہ تینوں قسموں کا واجب نہ ہونا ثابت نہیں ہوتا ہے، اس لئے تلاوت کے تمام سجدے واجب ہیں۔ سجدۂ تلاوت کے وجوب پر چوتھی دلیل وہ ہے جس کو جامع الآثار میں بیان کیا ہے کہ رسول اللہ صلی اللہ علیہ وآلہ وسلم نے تلاوت کے سجدوں پر مواظبت اور پابندی فرمائی ہے اس سے بھی سجدۂ تلاوت کے واجب ہونے کا ثبوت ملتا ہے۔

ف: اس حدیث شریف سے یہ ثابت ہوتا ہے کہ سواری کی حالت میں آیت سجدہ سننے یا پڑھنے سے اگر سجدۂ تلاوت واجب ہوا ہے تو اتر کر زمین پر بھی سجدۂ تلاوت ادا کیا جا سکتا ہے اور اگر اترے بغیر سواری ہی پر اشارے سے سجدۂ تلاوت ادا کر لیا جائے تو بھی سجدۂ تلاوت جو واجب ہے ادا ہو جائے گا۔ البتہ سجدۂ تلاوت اگر زمین پر چلنے کی حالت میں واجب ہوا ہے تو اس کو سواری پر ادا نہیں کیا جا سکتا، زمین ہی پر سجدہ کو ادا کرنا ضروری ہے۔ (ردالمحتار) حدیث شریف میں جو مذکور ہے کہ جو حضرات سوار تھے انہوں نے ہاتھ پر سجدہ کیا، اس بارے میں ترجمہ اعلاء السنن میں لکھا ہے: ہاتھ پر سجدہ کرنا اشارہ سے سجدہ کرنا ہی تھا اگرچہ اشارہ کے لئے اس قدر سر جھکانا ضروری نہ تھا مگر ان حضرات نے غایت تعظیم کے لئے اس قدر سر جھکایا۔

ف: اس حدیث شریف سے سجدہ تلاوت کا شدت اہتمام معلوم ہوتا ہے جو سجدہ تلاوت کے واجب ہونے کی علامت ہے اور اس حدیث شریف سے یہ بھی ثابت ہوتا ہے کہ سجدہ تلاوت جس طرح پڑھنے والے پر واجب ہے، اسی طرح سننے والے پر بھی سجدہ تلاوت واجب ہے (مرقات، اطفاء الفتن ترجمہ اعلاء السنن)

ف: اس حدیث شریف سے اور اس کے بعد والی دونوں حدیثوں سے ثابت ہوتا ہے کہ مفصلات میں بھی سجدۂ تلاوت ہے اور ان کا اداء کرنا بھی واجب ہے اور یہی مذہب حنفی ہے (مرقات)

ف: جامع الآثار میں لکھا ہے: اس حدیث شریف کے الفاظ ”فَلَمْ يَزَلْ يَسْجُدُ بِهَا“ (حضور علیہ الصلوٰۃ والسلام سورہ ص کے سجدہ تلاوت کو ہمیشہ ادا فرماتے تھے) واضح رہے کہ رسول اللہ صلی اللہ علیہ وآلہ وسلم کا سورہ ص کے اس سجدہ تلاوت کو ہمیشہ ادا کرنا، اور اس کو کسی وقت بھی ترک نہ کرنا اس سے ثابت ہے کہ سورہ ص کا سجدہ تلاوت بھی واجب ہے (یہ فتح القدیر میں مذکور ہے)۔

ف: واضح ہو کہ نماز کے سجدہ میں جس تسبیح یعنی سُبْحَانَ رَبِّيَ الْأَعْلٰى کا پڑھنا مسنون ہے، سجدۂ تلاوت میں بھی اسی تسبیح کا پڑھنا کافی ہے اس لئے کہ نماز کا سجدہ سجدۂ تلاوت کے سجدہ سے افضل ہے۔ اور جب نماز کے سجدہ میں سُبْحَانَ رَبِّيَ الْأَعْلٰى کا پڑھنا کافی ہے تو سجدۂ تلاوت میں سُبْحَانَ رَبِّيَ الْأَعْلٰى کا پڑھنا بدرجۂ اولیٰ کافی ہوگا خواہ فرض نماز میں سجدۂ تلاوت ادا کیا جا رہا ہو یا نفل نماز میں یا خارج نماز، الغرض سجدۂ تلاوت ادا کرنے والا سجدۂ تلاوت میں سُبْحَانَ رَبِّيَ الْأَعْلٰى پڑھے۔ اب رہا اوپر کی دونوں حدیثوں میں تلاوت کے سجدوں میں ماثورہ دعاؤں کا پڑھنا جو مذکور ہے تو ان کو ایسی نمازوں کے سجدۂ تلاوت میں سُبْحَانَ رَبِّيَ الْأَعْلٰى کے بعد پڑھنا مستحب ہے جو عموماً تنہا پڑھی جاتی ہیں جیسے تہجد، وتر، سنت اور نفل، اسی طرح کوئی شخص کسی فرض نماز کو تنہا پڑھ رہا ہے اور اس میں آیت سجدہ پڑھی گئی تو وہ سجدۂ تلاوت میں سُبْحَانَ رَبِّيَ الْأَعْلٰى کے ساتھ ان ماثورہ دعاؤں کو بھی پڑھ سکتا ہے اور خارج نماز سجدۂ تلاوت ادا کرنے والے کے لئے بھی سُبْحَانَ رَبِّيَ الْأَعْلٰى کے ساتھ ان ماثورہ دعاؤں کا پڑھنا افضل ہے۔ (اشعۃ اللمعات، مرقات، درمختار، ردالمحتار، کوکب دری، اعلاء السنن)