Hadith 1283

فضالۃ بن عبید رضی اللہ عنہ سے روایت ہے، وہ فرماتے ہیں کہ رسول اللہ صلی اللہ علیہ وسلم تشریف فرما تھے کہ اتنے میں ایک شخص نے آ کر نماز پڑھی (اور قعدۂ اخیرہ میں اس شخص (یہ ترجمہ ابوداؤد کی روایت کے لحاظ سے کیا گیا ہے) نے نہ تو اللہ تعالیٰ کی تعریف کی اور نہ رسول اللہ صلی اللہ علیہ وسلم پر درود بھیجا) (یہ قید مرقات میں مذکور ہے) اور صرف اَللّٰهُمَّ اغْفِرْلِيْ وَارْحَمْنِيْ (یعنی اے اللہ مجھے بخش دے اور مجھ پر رحم فرما) کہا اس پر رسول اللہ صلی اللہ علیہ وسلم نے ارشاد فرمایا اے نماز پڑھنے والے تو نے جلدی کی ہے، جب تو نماز پڑھے اور قعدۂ اخیرہ میں بیٹھے تو پہلے التحیات کے ذریعہ (یہ قید مرقات سے ماخوذ ہے۔) اللہ تعالیٰ کی حمد بیان کر جیسا کہ اس کے شایان شان ہے پھر مجھ پر درود بھیج، اس کے بعد اللہ سے دعاء مانگ۔ فضالہؓ کہتے ہیں کہ اس واقعہ کے بعد ایک اور شخص نے نماز پڑھی تو اس نے (نماز کے قعدۂ اخیرہ میں التحیات کے ذریعہ اللہ تعالیٰ کی حمد بیان کی اور نبی صلی اللہ علیہ وسلم پر درود بھیجا (اور دعاء نہ کی) تو اس شخص سے نبی صلی اللہ علیہ وسلم نے ارشاد فرمایا اے نماز پڑھنے والے اب دعاء کر تیری دعاء قبول ہوگی۔ (اس کی روایت ترمذی نے کی ہے اور ابوداؤد و نسائی نے بھی اسی طرح روایت کی ہے۔)