Hadith 4455

سیدنا سمرۃ بن جندب رضی اللہ تعالیٰ عنہ سے مروی ہے نبی اکرم صلی اللہ علیہ وسلم جب نماز ادا فرماتے تو رخ انور کے ساتھ ہماری جانب1 متوجہ ہوتے پھر فرماتے:تم میں سے آج کی رات کس نے خواب دیکھا ہے؟ راوی نے کہا: اگر کوئی دیکھا ہوتا اس کو بیان کر دیتا، تو آپ ﷺ اللہ کو جو منظور ہوتا فرماتے۔ ایک دن آپ ﷺ نے ہم سے دریافت فرمایا: کیا تم میں سے کسی نے کوئی خواب دیکھا ہے؟ ہم نے عرض کیا: نہیں، آپ نے فرمایا: میں نے رات میں دو آدمی دیکھے ہیں وہ میرے پاس آئے اور میرا ہاتھ پکڑے اور مقدس سرزمین کی طرف لے گئے تو میں کیا دیکھتا ہوں کہ ایک شخص بیٹھا ہوا ہے اور ایک شخص کھڑا ہوا ہے اس کے ہاتھ میں لوہے کی آنکس ہے۔ جس کو یہ اس کے جبڑے میں ڈال کر اس کو پھاڑ دیتا ہے یہاں تک کہ وہ اس کی گدی تک پہنچتا ہے پھر دوسرے جبڑے میں یہی عمل کرتا ہے اور اس کا یہ جبڑا پھر مل جاتا ہے تو وہ دوبارہ لوٹتا ہے اور اسی کے جیسا کرتا ہے۔ میں نے کہا: یہ کیا ہے؟ ان دونوں نے کہا: چلے ہم چلے یہاں تک کہ ایک گدی کے بل لیٹے ہوئے شخص کے پاس آئے، اور اس کے سر کے پاس ایک شخص پتھر یا چٹان لئے کھڑا ہے جس سے اس کا سر کچلتا ہے، جب اس کو مارتا ہے تو پتھر لڑھکتے ہوئے چلے جاتا ہے پھر وہ شخص اس کے پاس لینے جاتا ہے اور اس کے پاس لوٹنا بھی نہیں کہ اس کا سر درست ہو جاتا اور جیسا تھا ویسا ہو جاتا ہے تو وہ شخص اس کے پاس لوٹ کر آتا ہے پھر مارتا ہے۔ میں نے کہا: یہ کیا ہے؟ ان دونوں نے عرض کیا: چلے، ہم وہاں سے چلتے رہے یہاں تک کہ تنور کے جیسے ایک سوراخ کے پاس پہنچے اس کا بالائی حصہ تنگ اور نیچے کا کشادہ تھا اس کے نیچے آگ بھڑک رہی تھی جب آگ لپکتی ہے تو وہ لوگ اوپر آتے ہیں حتیٰ کہ اس سے نکلنے کے قریب ہوتے ہیں اور جب آگ بجھتی ہے تو وہ اس میں لوٹ جاتے ہیں، اور اس میں چند مرد اور برہنہ عورتیں ہیں۔ میں نے کہا: یہ کیا ہے؟ انہوں نے کہا: چلے، ہم چلتے رہے یہاں تک کہ خون کی ایک نہر کے پاس پہنچے، اس میں نہر کے وسط میں ایک آدمی کھڑا ہے اور نہر کے کنارے ایک آدمی ہے جس کے سامنے پتھر ہے پس جب آدمی آتا ہے جو نہر میں ہے اور جب نکلنے کا ارادہ کرتا ہے تو یہ آدمی پتھر اس کے منہ پر پھینک مارتا ہے جو اس کو جہاں تھا وہیں اس کو لوٹا دیتا ہے، پس جب بھی وہ نکلنے کے لئے آتا تو یہ شخص پتھر اس کے منہ پر پھینک مارتا ہے تو وہ جیسا تھا ویسا ہی لوٹ جاتا۔ میں نے کہا: یہ کیا ہے؟ انہوں نے کہا: چلے ہم چلتے رہے یہاں تک کہ ایک ہرے بھرے باغ میں آئے، اس میں ایک بڑا درخت تھا جس کی جڑ میں ایک بزرگ اور چند بچے تھے اور کیا دیکھتا ہوں کہ درخت کے قریب ایک آدمی ہے جس کے سامنے آگ ہے جس کو وہ دہکا رہا ہے، وہ دونوں مجھے لے کر درخت پر چڑھے پس درخت کے درمیان ایک گھر میں مجھے داخل کئے جس سے زیادہ خوبصورت میں نے کبھی نہیں دیکھا اس میں چند بزرگ و نوجوان عورتیں اور بچے ہیں پھر وہ دونوں مجھے وہاں سے لائے پس مجھ کو لے کر درخت پر چڑھے ایسے گھر میں داخل ہوئے جو پہلے والے سے زیادہ خوبصورت و بہتر تھا، اس میں چند بزرگ اور نوجوان تھے۔ میں نے ان دونوں سے کہا: رات میں آپ نے مجھے سیر کرائی تو میں نے جو کچھ دیکھا ہے اس کے بارے میں مجھے بتاؤ۔ انہوں نے کہا: ہاں! اب رہا وہ شخص جس کو آپ نے دیکھا ہے کہ اس کے جبڑے پھاڑے جا رہے ہیں وہ جھوٹا شخص ہے جو جھوٹی باتیں بیان کرتا ہے اور اس سے وہ نقل کی جاتی ہیں یہاں تک وہ دور دور تک پہنچ جاتی ہے، پس قیامت تک اس سے یہی معاملہ کیا جائے گا، جس کا آپ مشاہدہ فرما رہے تھے۔ اور وہ شخص جس کو آپ نے دیکھا کہ اس کا سر کچلا جا رہا ہے یہ وہ شخص ہے جس کو اللہ نے قرآن کا علم دیا تو وہ رات میں اس سے غافل ہو کر سو گیا اور دن میں اس میں جو کچھ ہے اس پر عمل نہیں کیا تو اس کے ساتھ قیامت تک وہی معاملہ کیا جاتا رہے گا جس کا آپ نے مشاہدہ فرمایا۔ اور جن کو آپ نے سوراخ میں دیکھا وہ زنا کار ہیں۔ اور جس کو آپ نے نہر میں دیکھا وہ سود خوار ہے۔ اور جن بزرگ کو آپ نے درخت کی جڑ میں دیکھا وہ ابراہیم (علیہ السلام) ہیں۔ اور ان کے اطراف جو بچے ہیں وہ لوگوں کے بچے ہیں۔ اور جو آگ دہکا رہے تھے وہ مالک ہیں جو دوزخ کے داروغہ ہیں۔ وہ پہلا گھر جس کے اندر آپ تشریف لے گئے تھے عام مومنین کا گھر ہے اب رہا یہ گھر تو یہ شہداء کا گھر ہے اور میں جبرئیل ہوں اور یہ میکائیل ہیں، آپ اپنا سر مبارک اٹھائیں، میں نے اپنا سر اٹھایا تو کیا دیکھتا ہوں کہ میرے اوپر بادل کے مثل۔ اور ایک روایت میں سفید بادل کے مثل کچھ ہے ان دونوں نے کہا وہ آپ کا مقام ہے میں نے کہا مجھے چھوڑ دو کہ میں میری منزل میں چلا جاؤں انہوں نے کہا: آپ کی عمر باقی ہے جس کو آپ پورا نہیں کئے ہیں جب آپ اس کو پورا کرلیں گے تو اپنی منزل میں تشریف لے جائیں گے۔ (بخاری)