Chapter on the Virtues of the Adhan, the Excellence of Leading Prayer, and Responding to the Mu'adhdhin

ف(1): امام ابن الہمام رضی اللہ عنہ نے کہا ہے کہ ہمارے پاس اذان دینے سے امامت کرنا افضل ہے اس لئے کہ رسول اللہ صلی اللہ علیہ وسلم نے امامت کرنے پر مداومت فرمائی ہے اور اسی طرح حضور صلی اللہ علیہ وسلم کے بعد خلفائے راشدین رضی اللہ عنہم نے بھی امامت کرنے کی ہمیشہ پابندی کی ہے۔ ف(2): واضح ہو کہ ہمارے پاس اذان دینے سے امامت کرنا افضل ہے، اس کے برخلاف امام شافعی رحمۃ اللہ علیہ کے پاس امامت سے اذان دینا افضل ہے، امام شافعی رحمۃ اللہ علیہ نے اذان کی فضیلت پر ابو ہریرہ رضی اللہ عنہ کی جس حدیث سے استدلال کیا ہے وہ حدیث یہ ہے کہ ”الْإِمَامُ ضَامِنٌ وَالْمُؤَذِّنُ مُؤْتَمَنٌ. اَللّٰهُمَّ أَرْشِدِ الْأَئِمَّةَ وَاغْفِرْ لِلْمُؤَذِّنِينَ“، امام ضامن ہے۔ (کہ مقتدیوں کی نماز کی صحت امام کی صحت نماز پر منحصر ہے) اور مؤذن امانت دار ہے۔ (کہ لوگ نمازوں کے پڑھنے اور روزوں کے افطار میں مؤذن پر اعتماد کرتے ہیں) اے اللہ! اماموں کو علم و عمل کی ہدایت فرما اور مؤذنوں کو بخش دے۔ امام شافعی رحمۃ اللہ علیہ کا اس حدیث سے استدلال یہ ہے کہ امین کی حالت ضامن کی حالت سے افضل ہوتی ہے، اس لئے امام پر مؤذن کو فضیلت حاصل ہے، لیکن اس حدیث کے بارے میں اشعۃ اللمعات میں لکھا ہے کہ اس حدیث سے امام اور مؤذن میں کسی کی افضلیت ظاہر کرنا مقصود نہیں ہے بلکہ حضور صلی اللہ علیہ وسلم نے ہر ایک کے حال کو بیان فرما کر ہر دو کیلئے دعائے خیر فرمائی ہے۔ (اشعۃ اللمعات کی عبارت ختم ہوئی) اگر اس حدیث سے کسی ایک کی فضیلت ظاہر کرنا مقصود ہے تو درحقیقت امام ہی کی فضیلت معلوم ہوتی ہے کہ مؤذن تو صرف اوقات نماز پر امین ہے حالانکہ امام ارکان نماز کا ضامن ہوتا ہے، نیز امام بوقت دعا، مقتدیوں اور پروردگار کے درمیان سفارت اور واسطہ کا کام دیتا ہے، یہ کہاں اور وہ کہاں؟ امام افضل کیوں نہ ہو کہ وہ رسول اللہ صلی اللہ علیہ وسلم کا خلیفہ ہے اور مؤذن بلال رضی اللہ عنہ کا جانشین ہے، اس سے بخوبی ظاہر ہے کہ امام اور مؤذن میں افضل کون ہے؟ علاوہ ازیں حضور صلی اللہ علیہ وسلم نے اماموں کیلئے راہ حق پر قائم رہنے کی دعا فرمائی ہے اور مؤذنین کیلئے مغفرت کی دعا فرمائی ہے، واضح ہو کہ راہ حق پر قائم رہنے کی دعا مغفرت کی دعا سے اعلیٰ و ارفع ہے کیونکہ مغفرت کا تقاضہ یہ ہے کہ کچھ گناہ سرزد ہوئے ہیں اور ان کی بخشش کی دعا کی جا رہی ہے اس کے برخلاف راہ حق پر قائم رہنے کا تقاضہ مقصد کو پا لینا ہے۔ (یہ مرقات میں مذکور ہے۔) امامت کے افضل ہونے کی تائید میں اور حدیثیں ہیں جو ذیل میں آ رہی ہیں۔

ف: مرقات میں لکھا ہے کہ اس حدیث سے امامت کی اذان پر فضیلت ثابت ہوتی ہے کیوں کہ اذان دینے والے کیلئے کسی قسم کی شرط نہیں لگائی گئی اس کے برخلاف امام کیلئے بڑے ہونے کی شرط لگائی گئی ہے اور یہ امامت کے افضل ہونے کی واضح ترین دلیل ہے۔12

ف: اس حدیث میں مذکور ہے کہ تم بھی اسی طرح کہو جو مؤذن کہتا ہے اس سے مراد یہ ہے کہ اذان سننے والے پر واجب ہے کہ مؤذن جن الفاظ کو ادا کرے، جواب دینے والا بھی انہی الفاظ کو جواب میں ادا کرتا جائے لیکن امام حلوانی نے کہا ہے کہ مؤذن کا جواب دینا زبان سے مستحب ہے اور واجب یہ ہے کہ اذان سنتے ہی مسجد کی طرف چلتا کہ جماعت فوت نہ ہو۔ اگر اذان سن کر مسجد کو نہ جائے تو ترک واجب سے گنہگار ہوگا۔ (یہ درمختار میں مذکور ہے اور درمختار میں اس جگہ اور بھی تفصیل ہے۔ (جس کی تشریح ردالمحتار میں کی گئی ہے۔)

ف(1): علامہ شوکانی رحمۃ اللہ علیہ نے کہا ہے کہ اس حدیث میں اذان کے تمام کلمات ایک ایک بار مذکور ہیں جو بغرض تعلیم اختصار کے ساتھ ذکر کئے گئے ہیں ورنہ جیسے اوپر گزر چکا ہے اذان کے یہ سب کلمات دو دو بار ہیں۔ ف(2): اس حدیث میں مذکور ہے کہ “حَيَّ عَلَى الصَّلٰوةِ” اور “حَيَّ عَلَى الْفَلَاحِ” ان ہر دو کلمات کے جواب میں “لَاحَوْلَ وَلَاقُوَّةَ إِلَّا بِاللّٰهِ” کہیں۔ عمدۃ المفتی میں لکھا ہے کہ “حَيَّ عَلَى الصَّلٰوةِ” اور “حَيَّ عَلَى الْفَلَاحِ” ان ہر دو کلمات کے جواب میں “لَاحَوْلَ وَلَاقُوَّةَ إِلَّا بِاللّٰهِ” کے ساتھ “مَاشَاءَ اللّٰهُ كَانَ” اضافہ کریں اور “کافی” میں ان دونوں چیزوں میں اختیار دیا ہے کہ چاہیں تو “حَيَّ عَلَى الصَّلٰوةِ” اور “حَيَّ عَلَى الْفَلَاحِ” کے جواب میں صرف “لَاحَوْلَ وَلَاقُوَّةَ إِلَّا بِاللّٰهِ” پڑھیں یا صرف “مَاشَاءَ اللّٰهُ كَانَ” پڑھیں، البتہ “محیط” میں تفصیل ہے کہ “حَيَّ عَلَى الصَّلٰوةِ” سن کر “لَاحَوْلَ وَلَاقُوَّةَ إِلَّا بِاللّٰهِ ” کہے اور “حَيَّ عَلَى الْفَلَاحِ” پر “مَاشَاءَ اللّٰهُ كَانَ” کہے (اسماعیل) لیکن قول مختار قول اول ہے کہ “حَيَّ عَلَى الصَّلٰوةِ” اور “حَيَّ عَلَى الْفَلَاحِ” ان کلمات میں سے ہر ایک کے جواب میں “لَاحَوْلَ وَلَاقُوَّةَ إِلَّا بِاللّٰهِ” اور “مَاشَاءَ اللّٰهُ كَانَ” کو جمع کرے (نوح آفندی) یہ ردالمحتار میں مذکور ہے۔12