Hadith 1518

انس رضی اللہ عنہ سے روایت ہے وہ فرماتے ہیں کہ رسول اللہ صلی اللہ علیہ وآلہ وسلم ایک گھوڑے پر سوار تھے (کچھ عجیب اتفاق ہوا کہ باوجود شہسوار ہونے کے) گھوڑے سے زمین پر گر پڑے اور حضور علیہ الصلاۃ والسلام کا دایاں پہلو گرا چھل گیا (جس کی وجہ سے آپ کھڑے ہو کر نماز نہیں پڑھ سکے) اس لئے ایک فرض نماز کو آپ نے بیٹھے ہوئے پڑھائی اور ہم نے بھی آپ کے مقتدی ہو کر بیٹھے ہوئے اس فرض نماز کو ادا کیا، جب آپ سلام پھیر کر نماز سے فارغ ہوئے تو ہماری طرف متوجہ ہو کر ارشاد فرمایا اے (صاحبو! تم کو معلوم ہونا چاہئے کہ امام بنانے کا مقصد کیا ہے؟ سنو!) امام اسی لئے بنایا جاتا ہے کہ امام جیسا کرے مقتدی بھی ویسا ہی کریں (یعنی) جب امام کھڑے ہو کر نماز پڑھے تو تم بھی کھڑے ہو کر نماز پڑھو، اور جس وقت وہ رکوع کرے تو تم بھی اس کے بعد ہی متصل بلا فصل رکوع کرو اور جب وہ رکوع سے سر اٹھائے تو تم بھی سر اٹھاؤ اور جب وہ ”سَمِعَ اللّٰهُ لِمَنْ حَمِدَهُ“ کہے تو تم ”رَبَّنَا لَكَ الْحَمْدُ“ کہو، اور جب (یہ ایک اضافہ ایک روایت میں مذکور ہے۔ مرقات۔12) وہ سجدہ کرے تو تم بھی سجدہ کرو، اور جب امام (کسی عذر سے) بیٹھ کر نماز پڑھے تو تم سب بھی بیٹھ کر نماز پڑھو۔ اور مسلم کی ایک روایت میں ان الفاظ کا اضافہ ہے: تم امام سے اختلاف نہ کرو! جب وہ سجدہ کرے تو تم بھی سجدہ کرو۔