Hadith 1785

ف: اس حدیث شریف میں ارشاد ہے کہ جمعہ کی وہ ساعت جس میں دعاء مقبول ہوتی ہے وہ امام کے خطبہ کے لئے منبر پر بیٹھنے کے وقت سے لے کر فرض جمعہ کے ختم تک رہتی ہے حالانکہ خطیب کے خطبہ بیان کرنے کے وقت انصات یعنی چپ رہنے کا حکم ہے اور نماز میں تو بات کر ہی نہیں سکتے پھر دعا کا کیا موقع ملے گا۔ اس بارے میں صاحب مرقات نے علامہ بلقینی رحمہ اللہ کے حوالہ سے لکھا ہے کہ دعاء کے لئے زبان سے تلفظ شرط نہیں ہے، صرف دل میں دعاء کا خیال رکھنا کافی ہے۔ ایسا خیال رکھنے سے بھی قبول ہو جاتی ہے (مرقات)۔