Hadith 1797

ابو عبدالرحمن سلمی رضی اللہ عنہ سے روایت ہے وہ کہتے ہیں کہ امیر المؤمنین حضرت علی رضی اللہ عنہ نے فرمایا کہ (نماز جمعہ کی ادائیگی کے شرائط میں سے یہ ہے کہ) نماز جمعہ مصر جامع (یعنی ایسے مقام پر) ادا کی جائے (کہ اگر وہاں کے لوگ اس مقام کی بڑی مسجد میں جمع ہوں تو اس مسجد میں نہ سما سکیں، مصر سے کم از کم ایسا مقام مراد ہے اور اس سے زیادہ خواہ کتنا ہی بڑا مقام ہو وہ مصر ہی کہلائے گا) حضرت علی رضی اللہ عنہ نے یہ بھی فرمایا کہ تکبیرات تشریق بھی مصر جامع میں ہی پڑھی جائیں۔ (اس کی روایت ابن ابی شیبہ نے سند صحیح کے ساتھ کی ہے۔) اور عبدالرزاق، بیہقی اور ابوعبید نے بھی اس کی روایت کی ہے۔ اور مروزی نے اس کی روایت کتاب الجمعہ میں اسی طرح کی ہے اور علامہ عینی رحمہ اللہ نے ابو بدر رحمہ اللہ کے حوالہ سے لکھا ہے کہ امام محمد بن الحسن رحمہ اللہ نے فرمایا ہے کہ اس حدیث کی روایت حضرت معاذ اور حضرت سراقہ بن مالک رضی اللہ عنہما نے مرفوعاً کی ہے۔