Hadith 1847

سالم بن عبداللہ بن عمر رضی اللہ عنہم اپنے والد عبداللہ بن عمر رضی اللہ عنہما سے روایت کرتے ہیں ان کے والد حضرت ابن عمر نے فرمایا کہ (ایک بار) مجھے رسول اللہ صلی اللہ علیہ وآلہ وسلم کے ساتھ جہاد میں شریک ہونے کا اتفاق ہوا جو نجد کی طرف ہو رہا تھا۔ جب ہمارا دشمن سے مقابلہ ہوا تو ہم ان کے مقابلہ میں صف آرا ہوئے (اتنے میں نماز کا وقت آ گیا) اور رسول اللہ صلی اللہ علیہ وآلہ وسلم ہم کو نماز پڑھانے کا ارادہ فرمائے تو (ہماری فوج کے دو حصّے ہوئے) ایک حصّہ حضور کے ساتھ نماز میں شریک ہوا۔ اور دوسرا حصّہ دشمن کے مقابلہ میں (اس کو روکنے کے لئے) کھڑا رہا۔ آپؐ ان صحابہ کو جو آپ کے ساتھ نماز میں شریک تھے ایک رکعت اس طرح پڑھائے کہ اس رکعت کا رکوع اور دو سجدے ادا کر کے دوسری رکعت کے لئے کھڑے ہو گئے۔ پھر یہ حصّہ جو حضور کے ساتھ نماز کی ایک رکعت پڑھ چکا تھا دشمن کے مقابلہ پر جا کھڑا رہا۔ اور دوسرا حصّہ جو ابھی نماز نہیں پڑھا تھا وہ آ کر دوسری رکعت میں حضور صلی اللہ علیہ وآلہ وسلم کی اقتداء کیا تو ان کو بھی حضور ایک رکعت پڑھائے رکوع اور دو سجدے کر کے (قعدہ سے فارغ ہو کر) حضور سلام پھیر دئے۔ اس کے بعد ہر حصہ اپنی اس رکعت کو جو رہ گئی تھی (اس طرح) ادا کیا (کہ دوسرا حصہ دشمن کے مقابلہ کے لئے چلا گیا۔ اور پہلا حصہ دشمن کے مقابلہ سے واپس آ کر لاحق کی طرح بغیر قرأت کے ایک رکعت ادا ء کر لیا اور سلام کے بعد دشمن کے مقابلہ کے لئے چلا گیا اور دوسرا حصہ جو دشمن کے مقابلہ پر کھڑا تھا وہ واپس آ کر اپنی دوسری رکعت مسبوق کی طرح قرأت کے ساتھ پوری ادا کر کے سلام پھیر دیا۔ اسی طرح ہر حصہ کے دو رکعت پورے ہوئے حنفی مذہب میں یہ مشہور روایت ہے)۔ (اس حدیث کی روایت بخاری نے کی ہے۔) 3/2144-2145۔ حضرت ابن عمر سے دو روایتیں آئی ہیں ایک کی سالم بن عبداللہ روایت کئے ہیں جو ابھی صدر میں مذکور ہوئی ہے۔ دوسری روایت حضرت ابن عمر سے نافع بعینہ سالم کی روایت کی طرح روایت کر کے اس میں اتنا اضافہ کئے ہیں کہ اگر اس قدر خوف ہو کہ صدر کے طریقہ کے موافق امام فوج کے دو حصہ کر کے ایک ایک حصہ کو لے کر نماز نہ پڑھا سکتا ہے تو وہ مذکورہ طریقہ پر نماز پڑھائے۔ اگر خوف اس سے کہیں زیادہ ہے (مثلاً حملہ ہو رہا ہواور جماعت اور صف نہ کر سکیں) تو شخص اکیلا اکیلا اس طرح نماز پڑھے کہ ایک جگہ کھڑا ہوا ہو یا سواری پر ہواور رکوع اور سجدہ اشارہ سے کر رہا ہو، خواہ قبلہ رخ رہنے کا موقع ملے یا نہ ملے (بہر حال نماز پڑھ لینی چاہئے۔ اگر جنگ کی وجہ سے ایک جگہ کھڑا ہو کر نماز نہیں پڑھ سکتا ہے بلکہ چلتے ہوئے پڑھ سکتا ہے تو چلتے ہوئے نماز پڑھنا جائز نہیں ہے۔ اس لئے کہ چلتے ہوئے نماز پڑھنے سے نماز فاسد ہو جاتی ہے اور ایسی صورت میں اطمینان کے بعد اس کی قضاء پڑھ لے۔ بخلاف اس کے سواری پر ہو، اور سواری چل رہی ہے تو ایسے خوف کی حالت میں سواری پر فرض اور واجب نمازیں پڑھنا جائز ہے۔ اس کے برخلاف اگر خوف کی حالت نہ ہو تو سواری پر صرف نفل نمازیں جائز ہیں، فرض اور واجب نمازیں سواری پر جائز نہیں۔ سواری سے اتر کر زمین پر فرض اور واجب پڑھنا چاہئے)۔ (نافع کی یہ روایت بھی بخاری میں مذکور ہے۔)