Hadith 1931

سمرہ بن جندب رضی اللہ عنہ سے روایت ہے، وہ فرماتے ہیں کہ میں اور ایک انصاری لڑکا تیر اندازی کی مشق کر رہے تھے یہاں تک کہ جب آفتاب (طلوع کر کے) دیکھنے میں افق میں دو یا تین نیزہ کے مقدار بلند ہوا تو آفتاب کو (گہن لگا) ایسا معلوم ہوتا تھا کہ وہ تودہ نما ہی سیاہ گھاس کی طرح سیاہ ہو گیا ہے (یہ دیکھ کر) ہم نے آپس میں ایک دوسرے سے کہا کہ مسجد چلو، خدا کی قسم آفتاب کی یہ حالت ہونے سے رسول اللہ صلی اللہ علیہ وآلہ وسلم کی امت کے لئے کوئی نہ کوئی نئے احکام آئیں گے (چلو دیکھیں مسجد میں کیا ہو رہا ہے) سمرہؓ فرماتے ہیں کہ جیسے ہی ہم مسجد میں آئے تو کیا دیکھتے ہیں کہ رسول اللہ صلی اللہ علیہ وآلہ وسلم اپنے حجرہ مبارک سے باہر تشریف لائے ہیں اور آگے بڑھ کر کسوف کی نماز پڑھا رہے ہیں، (پہلی رکعت میں) قیام اتنا طویل فرمائے کہ ایسا طویل قیام ہم نے حضور کو کسی نماز میں کرتے نہیں دیکھا (اور آپ قرأت (ایسی) آہستہ فرما رہے تھے (جیسے دوسری سری نمازوں میں آہستہ قرأت فرمایا کرتے تھے جس کی وجہ سے) ہم حضور کی قرأت نہیں سن سکے، سمرہؓ فرماتے ہیں کہ پھر رکوع فرمائے اور ایسا طویل رکوع فرمائے جو کسی نماز میں ایسا طویل رکوع نہیں فرمائے تھے اور حضور رکوع میں جو کچھ پڑھ رہے تھے ہم اس کو نہیں سن سکے، پھر حضور سجدہ فرمائے اور ایسا طویل سجدہ فرمائے جو کسی نماز میں ایسا طویل سجدہ نہیں فرمائے تھے اور حضور سجدہ میں جو کچھ پڑھ رہے تھے ہم اس کو بھی نہیں سن سکے، پھر رسول اللہ صلی اللہ علیہ وآلہ وسلم دوسری رکعت کے ہر رکن کو پہلی رکعت کے ہر رکن کی طرح بحد طویل ادا فرمائے، سمرہؓ فرماتے ہیں کہ حضور دوسری رکعت پڑھ کر قعدہ میں تھے کہ سورج کا گہن ختم ہو گیا۔ اس کی روایت ابوداؤد نے کی ہے، اور ترمذی اور نسائی نے بھی اسی طرح روایت کی ہے، اور اس کی سند صحیح ہے اور ترمذی نے کہا ہے کہ یہ حدیث حسن صحیح ہے۔