Hadith 3030

عبید بن عمیر رحمہ اللہ (جو مشہور تابعی اور قاضی مکہ تھے) سے روایت ہے کہ حضرت عبداللہ بن عمر رضی اللہ عنہما بڑے جوش اور ولولہ کے ساتھ آگے بڑھ کر دونوں رکنوں یعنی حجر اسود اور رکن یمانی پر (بوسہ دیتے اور چھونے کے لئے لوگوں کے مجمع میں) گھس جاتے تھے (اس طرح کہ لوگوں کو اذیت نہ ہو) راوی حدیث کہتے ہیں کہ میں نے حضرت ابن عمرؓ سے عرض کیا کہ (دونوں رکنوں تک پہنچنے کے لئے آپ جس جوش و خروش کا اظہار کرتے ہیں میں نے کسی صحابی کو ایسا اہتمام کرتے ہوئے نہیں دیکھا۔ یہ سن کر آپ نے فرمایا، سنو! اگر میں ایسا کرتا ہوں تو اس کی وجہ یہ ہے کہ میں نے رسول اللہ صلی اللہ علیہ وآلہ وسلم کو یہ بھی فرماتے سنا ہے کہ ان کو چھونا گناہوں کا کفارہ ہے، اور میں نے رسول اللہ صلی اللہ علیہ وآلہ وسلم کو یہ بھی فرماتے سنا ہے کہ جو شخص اس گھر یعنی بیت اللہ شریف کے سات چکر (اس کے واجبات، سنن اور آداب کا خیال رکھ کر) کرے تو اس کا ایسا کرنا (ثواب میں) ایک غلام آزاد کرنے کے برابر ہوگا اور میں نے رسول اللہ صلی اللہ علیہ وآلہ وسلم کو یہ بھی فرماتے سنا ہے کہ جب بھی وہ (طواف کی حالت میں) ایک قدم رکھتا ہے اور ایک قدم اٹھاتا ہے تو (ہر قدم پر) اللہ تعالیٰ نے اس کا ایک گناہ معاف کرتے ہیں اور ایک نیکی اس کے نامہ اعمال میں لکھ دیتے ہیں۔ اس کی روایت ترمذی نے کی ہے۔ اور امام احمد کی ایک روایت میں جو سعید بن المسیب رحمہ اللہ سے مروی ہے اور وہ حضرت عمر رضی اللہ عنہ سے روایت کرتے ہیں کہ حضور صلی اللہ علیہ وآلہ وسلم نے حضرت عمر رضی اللہ عنہ کو فرمایا (اے عمر!) تم ایک طاقتور آدمی ہو (دوران طواف میں تم اس بات کا خیال رکھو کہ حجر اسود تک پہنچنے میں تمہاری طرف سے کسی کمزور کو ایذاء نہ پہنچے اور تکلیف نہ ہو، اگر بھیڑ نہ ہو، اور راستہ مل جائے تو) حجر اسود کو چھولو، ورنہ اس کی طرف رخ کر کے تکبیر اور تہلیل یعنی اَللّٰهُ أَكْبَرُ اور لَا إِلٰهَ إِلَّا اللّٰهُ کہہ لیا کرو۔ اس لئے کہ یہ عمل بھی استلام کے قائم مقام ہے۔ اس سے معلوم ہوا کہ حجر