Hadith 3056

عمرو بن عبداللہ بن صفوان رحمہ اللہ (جو تابعین میں سے ہیں) اپنے ماموں سے جن کا نام یزید بن شیبان رضی اللہ عنہ ہے (جو صحابی ہیں) روایت کرتے ہیں، یزید بن شیبان فرماتے ہیں کہ ہم عرفات میں اس مقام پر ٹھہرے ہوئے تھے، (جو زمانہ جاہلیت میں ہمارے قبیلہ کے لئے مخصوص تھا اور یہ مقام امام سے بہت دور تھا تو راوی حدیث) عمرو بن عبداللہ اس جگہ کو امیر حج کی جگہ سے بہت دور پا رہے تھے (انہوں نے اس دوری کو اپنے ماموں یزید بن شیبان سے بیان کیا تو انہوں نے کہا کہ ہم بھی رسول اللہ صلی اللہ علیہ وآلہ وسلم کے ساتھ عرفات میں اسی جگہ جو دور تھی قیام کئے تھے اور چاہتے تھے کہ حضور صلی اللہ علیہ وآلہ وسلم سے قریب ہوجائیں۔ حضور صلی اللہ علیہ وآلہ وسلم کو جب ہمارے اس خیال کی اطلاع ملی تو آپ نے ہمارے اس اشکال کو دور کرنے کے لئے ابن مربع انصاری رضی اللہ عنہ کو ہمارے پاس بھیجا اور) ابن مربع انصاری رضی اللہ عنہ، ہمارے پاس آئے اور کہا کہ میں آپ حضرات کے پاس رسول اللہ صلی اللہ علیہ وآلہ وسلم کا قاصد ہوں۔ (اور یہ پیام لایا ہوں) حضور صلی اللہ علیہ وآلہ وسلم نے ارشاد فرمایا ہے کہ تم اس وقت جہاں ٹھہرے ہوئے ہو وہیں ٹھہرے رہو (پورا میدان عرفات ٹھہرنے کی جگہ ہے) اور تم اپنے اس وقوف میں اپنے باپ حضرت ابراہیم علی نبینا وعلیہ الصلوٰۃ والسلام کی میراث یعنی سنت پر ہو (اس لئے امام سے دوری کے باوجود وقوفِ عرفات کی فرضیت ادا ہوجائے گی، اس لئے تم عرفات میں جہاں بھی ٹھہرے ہو، اس کو حقیر مت جانو)۔ اس حدیث کی روایت ترمذی، ابوداؤد، نسائی اور ابن ماجہ نے کی ہے۔