Hadith 3420

ف: واضح ہو کہ اس حدیث شریف میں رسول اللہ صلی اللہ علیہ وآلہ وسلم نے اپنی آخری وصیت میں دو باتوں کی بطور خاص تاکید فرمائی ایک نمازوں کی پابندی اور دوسرے غلاموں کے ساتھ حسن سلوک اس سے آپ کی غرض یہ تھی کہ لونڈی غلام پر ظلم نہ کریں طاقت سے زیادہ ان سے کام نہ لیں کھانے، پینے اور پہننے میں ان کو تکلیف نہ دیں۔ مختصر یہ کہ اسلام میں لونڈی غلاموں کے ساتھ جس برتاؤ کی تاکید کی گئی ہے اس زمانہ میں لوگ اپنے نوکروں اور دوستوں سے بھی نہیں کرتے۔ جو لوگ غلامی کی وجہ سے اسلام پر طعن کرتے ہیں وہ غلامی کی حقیقت سے بے خبر ہیں، حقیقت میں لونڈی غلاموں کو اپنی فرزندی میں لینا ہے اور اپنی اولاد کی طرح ایک لاوارث شخص کی پرورش کرنا ہے اس میں عقل کے اعتبار سے بھی کیا قباحت ہے۔ قیدیوں کے گزارے کے لئے اس سے بہتر کوئی اور صورت سمجھ میں نہیں آسکتی ہاں جو ان لوگوں سے وحشیانہ برتاؤ کریں ان پر طعن کرنا بجا ہے مگر اسلام پر طعن کرنا درست نہیں حضور صلی اللہ علیہ وآلہ وسلم کا اپنی زندگی کے آخری لمحات میں لونڈی غلاموں سے نیک سلوک کرنے کی تاکید فرماتے رہنا یہاں تک کہ زبان مبارک بے قابو ہوگئی، یہ حضور کی کمزوروں پر کتنی بڑی شفقت تھی۔ صلی اللہ علیہ وآلہ وسلم۔12