Hadith 3574

سیدنا وائل بن حجر رضی اللہ تعالیٰ عنہ سے روایت ہے کہ ایک عورت کو زنا پر مجبور کیا گیا تو نبی اکرم صلی اللہ علیہ وسلم نے اس عورت سے حد کو رفع فرما دیا40 البتہ اس آدمی پر جس نے اس کا ارتکاب کیا حد جاری فرمائی۔ راوی نے اس خاتون کے لئے مہر مقرر کئے جانے کا ذکر نہیں کیا41 (ترمذی) امام محمد کتاب الآثار میں حضرت ابراہیم سے روایت نقل کرتے ہیں کہ لوگوں میں سے آزاد ہو یا غلام اگر کسی عورت کو غصب کر لے یعنی زنا کرے تو اس پر حد ہے اور مہر نہیں ہے۔ اور انہوں نے کہا جب مہر واجب ہوتا ہے تو حد جاری نہیں کی جاتی اور جب حد لگائی جاتی ہے تو مہر باطل ہو جاتا ہے۔ اور امام محمد فرماتے ہیں جب عورت کو مجبور کیا جائے تو اس پر حد جاری نہیں ہوگی۔ اور جو اس کو مجبور کیا ہے اس پر حد جاری ہوگی۔ اور جب حد واجب ہوگی تو مہر باطل ہو جائے گا۔ ایک جماع میں حد اور مہر دونوں واجب نہیں ہوتے۔ اور اگر کسی شبہ کی بناء حد جاری نہ ہو تو اس پر مہر واجب ہوتا ہے امام ابوحنیفہؒ، ابراہیم نخعیؒ اور ہمارے اکثر فقہاء کا یہی قول ہے۔ امام ترمذی اور امام ابوداؤد کی روایت میں وائل بن حجر سے مروی ہے کہ ایک خاتون نبی اکرم صلی اللہ علیہ وسلم کے زمانے میں نماز کے ارادہ سے نکلی تو اس سے ایک آدمی ملا اور اس پر چھا گیا اور اس سے اپنی حاجت کو پوری کر لیا عورت نے چیخ ماری تو وہ مرد چلا گیا۔ مہاجرین کی ایک جماعت گزری تو اس عورت نے کہا کہ وہ آدمی میرے ساتھ ایسا عمل کیا۔ وہ اس آدمی کو پکڑ کر رسول اللہ صلی اللہ علیہ وسلم کے پاس لے آئے۔ آپ صلی اللہ علیہ وسلم نے اس عورت سے فرمایا تو چل جا اللہ نے بخش دیا۔ اور جو آدمی زنا کیا تھا اس کے متعلق فرمایا تم اس کو رجم کردو۔ آپ صلی اللہ علیہ وسلم نے فرمایا کہ اس نے ایسی توبہ کی ہے اگر اہل مدینہ ایسی توبہ کرتے تو ان سے تو قبول کرلی جاتی۔