Hadith 5066

سیدنا ابوکبشہ انماری رضی اللہ تعالیٰ عنہ سے روایت ہے کہ انہوں نے رسول اللہ ﷺ کو فرماتے ہوئے سنا ہے میں تین باتوں پر قسم کھاتا ہوں اور تم کو ایک حدیث سناتا ہوں اس کو تم یاد رکھو، اب رہی وہ چیزیں جس پر میں قسم کھاتا ہوں وہ یہ ہیں: (1) صدقہ دینے سے بندہ کا مال کم نہیں ہوتا۔ (2) کسی بندہ پر اس کے کسی حق میں ظلم نہیں کیا گیا اور وہ اس پر صبر کرے مگر اللہ تعالیٰ اس کی وجہ سے اس کی عزت بڑھا دیتا ہے۔(3) اور کوئی بندہ مانگنے کا دروازہ1 نہیں کھولتا مگر اللہ تعالیٰ اس پر تنگدستی کا دروازہ کھول دیتا ہے۔ رہی جو حدیث میں بیان کروں گا اور تم اس کو یاد رکھو! وہ یہ ہے آپ نے فرمایا: اس کے سوا نہیں دنیا تو چار قسم کے افراد کے لئے ہے۔(1) ایک وہ بندہ جس کو اللہ نے مال اور علم دیا اور وہ اس میں اپنے رب سے ڈرتا ہے اور رشتہ داری کے ساتھ حسن سلوک کرتا ہے اور اللہ کے لئے اس کے حق کے مطابق اس میں کام کرتا ہے تو یہ شخص سب سے بڑے مرتبہ والا ہے۔(2) ایک وہ بندہ جس کو اللہ نے علم دیا اور مال نہیں دیا اور وہ سچی نیت والا ہے اور کہتا ہے کہ اگر میرے لئے بھی مال ہوتا تو میں فلاں کے جیسا عمل کرتا تو ان دونوں کا ثواب برابر ہے۔(3) اور ایک وہ بندہ ہے، اللہ تعالیٰ اس کو مال دیا علم نہیں دیا تو وہ علم نہ ہونے کی وجہ سے اپنے مال میں غلط سلط کام کرتا ہے اس میں اپنے رب سے ڈرتا بھی نہیں ہے، رشتہ داری کے ساتھ حسن سلوک بھی نہیں کرتا اور اس میں حق کے مطابق کام نہیں کرتا تو یہ سب سے زیادہ خراب درجے کا ہے۔(4) اور ایک وہ بندہ جس کو اللہ نے نہ مال دیا نہ علم دیا اور وہ یہ کہتا ہے کہ اگر میرے لئے مال ہوتا تو میں فلاں شخص کے عمل کی طرح2 عمل کرتا تو وہ اپنی نیت کے ساتھ ہوگا اور ان دونوں کا گناہ برابر3 ہے۔(ترمذی)۔ اور امام ترمذی نے اس حدیث کو حسن صحیح کہا ہے۔