Hadith 1801

جابر بن عبداللہ رضی اللہ عنہ سے روایت ہے وہ فرماتے ہیں کہ (ایک دن) رسول اللہ صلی اللہ علیہ وآلہ وسلم ہم کو خطبہ دئے (اس خطبہ میں) ارشاد ہوا کہ لوگو! موت آنے سے پہلے توبہ کر لو ورنہ (موت آنے کے بعد توبہ نہ کر سکو گے) اور دوسرے کاموں میں پھنس جانے سے پہلے نیک کاموں کے کرنے میں جلدی کرو (کیا معلوم کہ پھر تم سے نیک کام نہ ہو سکے، اللہ تعالیٰ سے بے تعلق ہو کر دنیا سے نہ جاؤ) تم اللہ تعالیٰ سے اپنا تعلق مضبوط کر لو، اللہ تعالیٰ سے تعلق مضبوط کرنے کے لئے (ایک تو) اللہ تعالیٰ کا کثرت سے ذکر کرنا چاہئے۔ (اور دوسرے) علانیہ اور چھپا کر کثرت سے خیرات کیا کرو کہ اللہ تعالیٰ کا ذکر اور خیرات اللہ تعالیٰ سے تمہارے تعلق کو مضبوط کر دیں گے (جب اللہ تعالیٰ سے تمہارا تعلق قوی ہوگا تو تم کو رزق کی فکر کی ضرورت نہیں) ہوگی، غیب سے تم کو رزق دیا جائے گا اور اللہ تعالیٰ تمہاری مدد فرمائیں گے اور تمہاری تائید کی جائے گی اور تمہاری شکستہ حالت کو درست کیا جائے گا (یقین جانو کہ اللہ تعالیٰ سے تمہارا تعلق جن امور سے مضبوط ہوتا ہے منجملہ ان کے ایک نماز جمعہ بھی ہے) اور نماز جمعہ میرے اسی مقام، میرے اسی دن، میرے اسی ماہ اور میرے اسی سال میں تم سب پر قیامت تک کے لئے فرض قرار دی گئی ہے پس میری زندگی میں یا میرے بعد خلیفہ وقت کے ہوتے ہوئے چاہے وہ عادل ہو یا ظالم کوئی نماز جمعہ کو حقیر سمجھ کر یا جمعہ کا منکر بن کر نماز جمعہ ترک کر دے تو اللہ تعالیٰ اس کی پریشان حالی کو دور نہ کرے اور اس کے کاموں میں برکت نہ دے، سنو! جب تک کہ وہ توبہ کر کے نماز جمعہ کا پابند نہ ہو جائے۔ اس وقت تک نہ تو اس کی نماز قبول ہوگی اور نہ اس کی زکات اداء ہوگی اور نہ اس کا حج مقبول ہوگا اور نہ روزہ اور نہ اس کی کوئی نیکی قبول ہوگی۔ پھر اگر وہ توبہ کر کے نماز جمعہ پابندی سے پڑھا کرے تو اللہ تعالیٰ اس کی توبہ قبول فرمائیں گے (اور اس کے دوسرے عبادات بھی قبول فرمائیں گے)۔ (اس کی روایت ابن ماجہ نے کی ہے اور بیہقی نے اس کی روایت سنن میں کی ہے اور بزار نے بھی اس کی روایت کی ہے۔) اور طبرانی نے اس کی روایت اوسط میں ابن عمر رضی اللہ عنہما سے اسی طرح کی ہے۔