Hadith 3256

ف: واضح ہو کہ رسول اللہ ﷺ نے چھ چیزوں یعنی سونا، چاندی، گیہوں، نمک، کھجور اور جو میں سود کی وضاحت فرما دی اور فقہائے امت نے قیاس سے ان چھ چیزوں کے علاوہ اور چیزوں میں بھی سود کو ثابت کیا ہے اس لئے مسلمانوں کو چاہئے کہ احتیاط کو نظر رکھتے ہوئے فقہاء نے جن چیزوں میں سود کو ثابت کیا ہے ان سے بھی بچنا چاہئے۔ توضیح: ذیل میں سودی معاملات کے بارے میں چند احادیث آ رہی ہیں ان کو سمجھنے کے لئے اس توضیح کو پیش نظر رکھا جائے، ورنہ ذرا سی بے احتیاطی سے بھی معاملہ سودی ہو جائے گا۔ ان حدیثوں میں جہاں کہیں ایک جنس کو اسی جنس سے بدلنے کا ذکر آ رہا ہے وہاں اس بات کو پیش نظر رکھنا چاہئے کہ ہم جنس اشیاء کی تبدیلی میں 1۔ کمی بیشی نہ کی جائے 2۔ معاملہ نقد ہو۔ 3۔ چیزوں کا دست بدست تبادلہ ہو۔ اور اگر ان تین صورتوں میں سے ایک صورت بھی نہ پائی جائے تو معاملہ سودی ہو جائے گا جیسے سونے کو سونے سے یا چاندی کو چاندی سے بدلنے کا جہاں ذکر ہے اس سے مراد یہ ہے کہ سونے کو اشرفی سے اور چاندی کو چاندی کے سکے سے یا سونے کے زیور کو سونے سے یا چاندی کے زیور کو چاندی سے خریدا یا بیچا جا سکتا ہے بشرطیکہ مذکورہ بالا تینوں صورتیں (ہم وزن ہونا، دست بدست ہونا اور معاملہ نقد ہونا) پائی جا رہی ہوں ورنہ معاملہ سودی ہو جائے گا۔ اسی طرح اجناس کے تبادلہ کا حال ہوگا۔ اس کی تفصیل ذیل کی احادیث میں آ رہی ہے۔