Hadith 4428

اور شرح معانی الآثار میں ہے کہ: پس اس حدیث میں یہ ہے کہ جس وقت کہ سعیدؒ نے سیدنا سعد رضی اللہ تعالیٰ عنہ کے سامنے بدشگونی کا ذکر کیا تو انہوں نے ان کو جھڑک دیا اور بتایا کہ نبی اکرم صلی اللہ علیہ وسلم نے فرمایا: شگونِ بد کا کوئی اعتبار نہیں ہے۔ پھر آپﷺ نے فرمایا: اگر کسی چیز میں شگون بد ہوتا تو عورت میں، گھوڑے میں اور گھر میں ہوتا‘‘ لیکن حضور صلی اللہ علیہ وسلم نے یہ نہیں بتایا کہ وہ واقعی ان میں ہوتا ہے۔ آپ ﷺ نے تو صرف فرمایا کہ اگر وہ کسی چیز میں ہوتا تو ان میں ہوتا یعنی اگر اس کا وجود ہوتا تو ضرور وہ ان اشیاء میں پایا جاتا۔ پس جب ان تینوں میں ہی اس کا وجود نہیں ہے تو پھر کسی چیز میں اس کا وجود نہیں ہے۔ اور سیدتنا عائشہ رضی اللہ تعالیٰ عنہا سے یہ مروی ہے کہ رسول اللہ صلی اللہ علیہ وسلم نے اس بارے میں جو کلام فرمایا، اس کے کلمات اس طرح نہیں ہیں۔ اس لئے کہ ابو حسان کہتے ہیں کہ قبیلہ بنی عامر کے دو آدمی سیدتنا عائشہؓ کے پاس آئے اور بیان کیا کہ ابو ہریرہؓ نبی اکرم صلی اللہ علیہ وسلم کی یہ حدیث بیان کرتے ہیں کہ آپ ﷺ نے فرمایا ہے کہ ’’عورت میں، گھر میں اور گھوڑے میں شگون بد ہے‘‘ تو وہ غصہ ہوئیں اور ان کا ایک بازو آسمان میں اور ایک بازو زمین میں چلا گیا۔ اور وہ کہنے لگیں: قسم ہے اس ذات کی جس نے محمد ﷺ پر قرآن کو نازل کیا! رسول اللہ صلی اللہ علیہ وسلم نے یہ بات کبھی نہیں فرمائی، آپ ﷺ نے تو یہ فرمایا: ’’اہل جاہلیت ان اشیاء سے بدفالی لیا کرتے تھے‘‘۔ پس سیدتنا عائشہ رضی اللہ تعالیٰ عنہا نے یہ بتایا کہ نبی اکرم صلی اللہ علیہ وسلم نے اپنے اس ارشاد میں یہ فرمایا کہ اہل جاہلیت ان چیزوں سے شگون بد لیتے تھے۔