Hadith 1833

جابر رضی اللہ عنہ سے روایت ہے وہ فرماتے ہیں کہ (ایک دفعہ) جمعہ کے دن خطبہ دینے کے لئے جب رسول اللہ صلی اللہ علیہ وآلہ وسلم منبر پر تشریف رکھے اور (ملاحظہ کئے کہ کچھ لوگ کھڑے ہوئے ہیں) تو حضور صلی اللہ علیہ وآلہ وسلم کھڑے ہوئے حضرات سے فرمائے کہ بیٹھ جاؤ (اگرچہ خطبہ کے وقت خطیب کا بات کرنا جائز نہیں ہے مگر امر بالمعروف کرنا جائز ہے، یہاں چونکہ جو صحابہ کھڑے ہوئے تھے ان کا امام کے منبر پر آ جانے کے بعد کھڑا رہنا ناجائز تھا، اس لئے حضور امر بالمعروف کے لئے بیٹھ جاؤ ارشاد فرمائے) حضور کا یہ ارشاد جو بیٹھ جانے کے لئے ہوا تھا، اس وقت ابن مسعود رضی اللہ عنہ مسجد کے دروازے کے پاس تھے، یہ ارشاد سنتے ہی ابن مسعود رضی اللہ عنہ حکم کی تعمیل کے لئے دروازے کے پاس ہی بیٹھ گئے (مگر مسجد میں جو لوگ کھڑے ہوئے تھے ان کے بیٹھنے کے لئے حکم ہوا تھا، دروازے کے پاس والے لوگوں کے لئے بیٹھنے کا حکم نہیں ہوا تھا اس لئے) عبداللہ بن مسعود کو ارشاد ہوا (یہ میرا حکم تم سے متعلق نہیں ہے) تم مسجد میں آ جاؤ (ابن مسعود کو بلانا بھی امر بالمعروف تھا)۔ (اس حدیث کی روایت ابوداؤد نے کی ہے۔)