Hadith 1869

سعید بن عمرو بن العاص رضی اللہ عنہ سے روایت ہے کہ انہوں نے حضرت ابو موسیٰ اشعری اور حضرت حذیفہ بن الیمان رضی اللہ عنہما سے دریافت کیا کہ حضرت رسول اللہ صلی اللہ علیہ وآلہ وسلم عیدالاضحی کی نماز اور عیدالفطر کی نماز میں کس طرح تکبیرات فرماتے تھے؟ حضرت ابو موسیٰ نے جواب دیا کہ جنازہ کی تکبیروں کی طرح دونوں عیدوں کی پہلی رکعت میں چار تکبیرات فرماتے تھے (جس میں سے پہلی تکبیر تکبیر تحریمہ ہوتی تھی، اس کے بعد ثناء پڑھتے پھر تین تکبیرات زائد فرماتے تھے، ہر دو تکبیروں کے بیچ میں تین تسبیحات کے موافق فصل کرتے تھے، اور ہر تکبیر کے ساتھ رفع یدین بھی کرتے تھے اور تیسری تکبیر کے بعد قیام کے لئے ہاتھ باندھ لیتے تھے ایسا ہی دوسری رکعت میں بھی نماز جنازہ کی طرح چار تکبیر فرماتے۔ جس میں سے پہلے تین تکبیرات زائد ہوتے ہر دو تکبیر کے بیچ میں تین تسبیحات کی مقدار فصل ہوتا تھا۔ ہر تکبیر کے ساتھ رفع یدین بھی کرتے تھے چوتھی تکبیر کے ساتھ بغیر رفع یدین کئے رکوع میں چلے جاتے تھے) حضرت حذیفہ نے ان کی تصدیق کی (اور فرمایا: ابو موسیٰ جیسا کہے ہیں حضرت رسول اللہ صلی اللہ علیہ وآلہ وسلم ایسا ہی کیا کرتے تھے) یہ سن کر حضرت ابو موسیٰ کہنے لگے کہ میرا اسی طرح عمل درآمد رہا ہے، جس وقت میں بصرہ کا حاکم تھا (میں دونوں عیدوں میں اسی طرح تکبیر کہا کرتا تھا)۔ اور عبدالرزاق نے ابن مسعود رضی اللہ عنہ سے اس کی روایت سند صحیح کے ساتھ کی ہے۔